අමාත්‍යවරයා මේ බව පැවසුවේ තුඹයා ලෙස ප්‍රසිද්ධව සිටින කේ. ඩබ්. චින්තක කුමාර විසින් රන්මිණිතැන්න ප්‍රදේශයේ වගා කර ඇති අක්කර හයක එළවළු වගාව නිරීක්ෂණයට සහභාගී වෙමිනි.
ලාංකික තරුණ පිරිස් නැවතත් කෘෂිකර්මාන්තයට පිවිසෙමින් සිටින අතර කෘෂිකර්මාන්තයට නව තාක්ෂණය හඳුන්වා දීමත් සමග තරුණ ආකර්ශනය ඉහල ගොස් ඇති බවද අමාත්‍යවරයා එහි දී පැවසීය.
තුඹ කරවිල වගාවෙන් රුපියල් මිලියන ගණනක් උපයා ඇති චින්තක කුමාර අනතුරුව උඩරට හා පහත රට එළවළු ගොවිපළේ සාර්ථකව වගා කර තිබෙන අතර කැරට්, බීට් රූට්, සලාද කොළ මෙන්ම ගෝවා ද මේ වනවිට එහි වගා කර ඇත.
නව කෘෂි තාක්ෂණය උපයෝගී කර ගනිමින් අවම රසායනික පොහොර හා කෘමිනාශක භාවිත කරමින් මෙහි එළවළු වගා කර තිබෙන අතර කාබනික පොහොර භාවිත කරමින් පරිසර හිතකාමී වගාවට යොමු වී තිබීම අගය කරන බව මෙම අවස්ථාවට සහභාගී වෙමින් කෘෂිකර්ම අමාත්‍යවරයා පැවසීය.
