දුම්රිය ගමනාගමන අධිකාරි එන්.ජේ. ඉදිපොලගේ පැවසුවේ, විදේශීය සංචාරකයින් දෙදෙනෙකුට නාවලපිටිය දුම්රිය ස්ථානයේදී සේවකයින් පිරිසක් පහර දුන් බව කියන සිද්ධිය සම්බන්ධයෙන් සේවය අත්හිටවූ දුම්රිය සේවකයින් දෙදෙනෙකුගේ සේවය යළි පිහිටුවා ඇති බවයි.
දුම්රිය ස්ථානාධිපතිවරුන් දෙදෙනෙකුගේ හා නියාමකවරයෙකුගේ සේවය එලෙස යළි පිහිටුවා තිබේ.
සිද්ධිය සම්බන්ධයෙන් පුළුල් විමර්ශනයක් ක්‍රියාත්මක බව ද ඔහු ප්‍රකාශ කළේ ය.
සිද්ධිය සම්බන්ධයෙන් අතුරු වාර්තාවක් ලැබී ඇති බවත් දුම්රිය ගමනාගමන අධිකාරිවරයා පැවසීය.
කොළඹ සිට බදුල්ල බලා ධාවනය වූ පොඩිමැණිකේ දුම්රියේ ගමන් ගත් එංගලන්ත ජාතිකයින් දෙදෙනෙකු පෙරේදා මෙම සිද්ධියට මුහුණ දුන්නේ ය.සිද්ධියට හේතුවී ඇත්තේ දුම්රියේ දෙවන පන්තියේ ප්‍රවේශපත් රැගෙන මෙම විදේශිකයින් දෙදෙනා පළමු පන්තියේ ගමන් කිරීම මත සිදු වූ බහින්බස්වීම දුරදිග යෑමෙනි .
සිද්ධිය සම්බන්ධයෙන් තවදුරටත් එක් දුම්රිය සේවකයෙකුගේ සේවය අත්හිටුවා තිබේ.
-P.M
