හපුතලේ - හල්දුම්මුල්ල නගරයේදී ඌව පළාත් සභාවට තරඟ වදින සන්ධාන අපේක්ෂකයින් දෙදෙනෙකු සහ ඔවුන්ගේ ආධාරකරුවන් පිරිසක් සිදුකළ පහරදීමකින් ජනතා විමුක්ති පෙරමුණේ අපේක්ෂකයෙකු සහ ඔහුගේ ආධාරකරුවන් දෙදෙනෙකු තුවාල ලබා ඇතැයි පැෆ්රල් සංවිධානය ප‍්‍රකාශ කරයි.
හල්දුම්මුල්ල නගරයේ ස්ථාපිත කර තිබෙන ජනතා විමුක්ති පෙරමුණු පක්ෂ කාර්යාලය ඉදිරිපිට ඊයේ (28) උදෑසන මැතිවරණ ප‍්‍රචාරක පුවරුවක් සවිකරමින් සිටියදී සන්ධාන ආධාරකරුවන් තමන්ට පහරදුන් බව ඌව පළාත් සභාවට එම පෙරමුණෙන් තරඟ වදින කේ. සෙල්වරාජ් මහතා කියා සිටියේය.
තුවාල ලැබූවන් දියතලාව රෝහලේ මේ වනවිට ප‍්‍රතිකාර ලබන අතර, සිද්ධිය සම්බන්ධයෙන් ජනතා විමුක්ති පෙරමුණ හපුතලේ පොලිසියට පැමිණිල්ලක් සිදුකර තිබේ.
පැෆ්රල් සංවිධානය පවසන්නේ මේ වනවිට ඌව මැතිවරණයට අදාළව පැමිණිලි 118 ක් තමන් වෙත ලැබී ඇති බවයි. ඉන් 75 ක්ම වාර්තා වී ඇත්තේ මොණරාගල දිස්ති‍්‍රක්කයෙනි. මැතිවරණ කාර්යාලවලට පහරදීම් 38 ක් අතුරින් පැමිණිලි 19 ක් ලැබී ඇත්තේ ජනතා විමුක්ති පෙරමුණෙනි.
කෙසේ වෙතත්, ඌව පළාත් සභා ඡන්ද විමසීමට අදාළව පොලිස් දෙපාර්තමේන්තුව වෙත මේ වනවිට ලැබී ඇත්තේ පැමිණිලි 22 ක් පමණි. මැතිවරණ ප‍්‍රචණ්ඩ කි‍්‍රයා සහ මැතිවරණ නීති උල්ලංඝනය කිරීමට අදාළව එම පැමිණිලි ලැබී ඇති බව පොලිස් මූලස්ථානය සඳහන් කළේය.
මොණරාගල - බඩල්කුඹුර නගරයේ ජනතා විමුක්ති පෙරමුණේ ප‍්‍රචාරක රැළියක් පැවැත්වීමට සැලසුම් කර තිබූ ස්ථානයකටද පසුගියදා ප‍්‍රහාරයක් එල්ල වූ අතර, පොලිසියේ වරදින් එම ගැටුම දිග්ගැස්සුණු බව කොළඹ පෙරේදා පැවති මාධ්‍ය හමුවකට එක්වෙමින් නිදහස් සන්ධානයේ මහ ලේකම් අමාත්‍ය සුසිල් පේ‍්‍රමජයන්ත මහතා කියා සිටියේය.
මේ අතර, මැතිවරණ ප‍්‍රචණ්ඩ කි‍්‍රයා ඉහළ යාම සම්බන්ධයෙන් පොලිස්පතිවරයා වෙත තමන් දෙවන ලිපියත් යොමුකළ බව මැතිවරණ කොමසාරිස් මහින්ද දේශපි‍්‍රය මහතා සඳහන් කළේය.
