ඊයේ (25) උදෑසන තිලාන් නමැත්තා ගුවන්තොටු‍පොළට පැමිණ ඇති අතර ඔහු ගුවන්තොටු‍පොළේ පිටත සිට ඇතුළට රැගෙන යාමට මෙම නිලධාරියා පැමිණි අවස්ථාවේ ඔහු ත්‍රස්ත විමර්ශන ඒකකය මගින් අත්අඩංගුවට ගෙන ඇත.

මොහු පැමිණ ඇත්තේ ඔහුගේ හිස වැසෙන සේ තොප්පියක් පැලඳ හා ඔහුගේ ශරීරයේ පච්ච වැසෙන සේ කබායක් පැලඳගෙනය. කෙසේ වෙතත් මේ වන විටත් ‘තිලාන්’ හඳුනාගෙන සිට ඇති අතර ඔහු ආරක්ෂක අංශ විසින් අත්අඩංගුවට ගැනීමට සූදානම් වනවිට ආගමන හා විගමන නිලධාරියා සැඟවී ඇති බව හෙළි වී ඇත.

දේවගේ තුසිත චාමර නොහොත් කුඩු ‘තිලාන්’ පැන ගියේ පසුගිය ජුනි 29 වැනිදාය. ඔහු කුඩු ග්‍රෑම් 500ක් සමග මත්ද්‍රව්‍ය නාශක කාර්යාංශය මගින් අත්අඩංගුවට ගැනුණේ පසුගිය ජුනි 20 වැනිදාය. එසේ අත්අඩංගුවට ගත් පසු බන්ධනාගාරගත කළ අතර ඔහු මහර බන්ධනාගාරයේ සිට රාගම රෝහලට ගෙනැවිත් ප්‍රතිකාර ලබාදෙමින් සිටියදී පලා ‘ගියේය.

ඔහු මෙලෙස ප්‍රතිකාර ලබාගැනීමට පැමිණ ඇත්තේ ඔහු විසින් තම රූපය වෙනස් කරගැනීම සඳහා හා තට්ට හිසෙහි කෙස් ගස් ඇලවීමට ගොස් හටගත් තුවාල හේතුවෙන් බව සඳහන් වෙයි. හිසෙහි ඇතිවූ වණයක් හේතුවෙන් මෙලෙස ප්‍රතිකාර ලබමින් සිටියදී ජුනි 29 රාත්‍රී 8.30ට පමණ මොහු පැනගොස් ඇත්තේ බන්ධනාගාර නිලධාරීන්ගේ සහායෙන් බව මේ වනවිට පරීක්ෂණවලදී හෙළි වී ඇත.

එසේ පැනගිය මොහු කොළොන්නාව ප්‍රදේශයේ සැඟව සිට ඇති අතර ඒ සඳහා කොළඹ කුඩු ජාවාරම්කරුවන් කිහිප දෙනෙකු උදව් දී ඇත.  එසේ සැඟව සිටින අවස්ථාවේ මොහු ඩුබායි රාජ්‍යයට පැනයාමට සූදානම්ව සිට ඇත්තේ ඒ වන විටත් ඩුබායි රාජ්‍යයේ සිටින ඔහුගේ හොර අඹුව සමීපයට යාමට බව මේ වනවිට හෙළි වී ඇත. 

ඔහු මෙලෙස ව්‍යාජ ගමන් බලපත්‍රයේ දේවගේ තුසිත චාමර යන නමට වෙනත් නමක් ලෙස දිසානායක ධනපාල ආරච්චිගේ සාගර තරිඳු යන නම  යොදා ඇත. මේ සඳහා ව්‍යාජ ගමන් බලපත්‍රය සැකසූ පුද්ගලයනුත් ඔහුට ආරක්ෂාව සැපයූ පුද්ගලයිනුත් ඔහුට අවසානයේ විදේශගතවීමට සහාය දුන් පුද්ගලයාත් ඉදිරියේදී අත්අඩංගුවට ගැනීමට නියමිත බව ‍පොලිසිය සඳහන් කරයි.
මේ වනවිට ඔහු ත්‍රස්ත විමර්ශන කාර්යාංශයේ තබාගෙන ප්‍රශ්න කරමින් සිටී.

(රිවිර)