එහිදී තුවාල ලැබූ සැකකාර තරුණයාත් ඔහුගේ සහෝදරියත් කොළඹ ජාතික රෝහලට ඇතුළත් කර ඇත. සිසුවියගේ පියාගේ ඉලක්කය වී ඇත්තේ සැකකාර තරුණයාය. තරුණයා බේරා ගැනීමට පියා මැදට පැනීම හේතුවෙන් ඔහු පිහි ඇනුමට ලක්ව මියගොස් ඇති බවත් තරුණයාගේ සහෝදරිය පිහි ඇනුමෙන් තුවාල ලබන්නේ පියාත් සහෝදරයාත් බේරාගැනීමට යෑමෙන් බවත් පොලීසිය සඳහන් කරයි. මෝදර ප්‍රදේශයේ පදිංචිකාරියක් වන 17 වියැති එම සිසුවිය කොළඹ පිහිටි ප්‍රධාන පෙළේ දෙමළ විද්‍යාලයක අධ්‍යාපනය ලබමින් සිටින්නියකි.
ඇය පැහැරගෙන ගොස් දූෂණය කර නිරුවත් ඡායාරූප ගත් බව සඳහන් තරුණයා මොරටුව ප්‍රදේශයේ පදිංචිකරුවෙකි. ෆේස්බුක් මගින් දැන හඳුනාගත් මේ දෙදෙනා පෙම්වතුන් බවද කියයි.
කොටහේන ප්‍රදේශයේ පිහිටි සුපිරි අවන්හලක් අසලදී ෆේස්බුක් පෙම්වතාව මුණගැසීමට ඇය ගිය අවස්ථාවේ ඉකුත් 19 වැනිදා ඇය පැහැරගෙන ගිය බවත් ගල්කිස්ස ප්‍රදේශයේ නවාතැන් පොළකදී නිරුවත් ඡායාරූප ලබාගෙන ඒවා ෆේස්බුක් හි පළකරන බව පවසා දූෂණය කළ බවත් 20 වැනිදා ඒ සම්බන්ධයෙන් කොටහේන පොලීසියට ලැබි ඇති පැමිණිල්ලෙහි සඳහන්ව තිබෙන බව කියයි.
එම පැමිණිල්ලට අනුව ක්‍රියාත්මක වූ කොටහේන පොලීසිය සැකකාර විසිපස් වියැති තරුණයා අත්අඩංගුවට ගෙන කොළඹ අංක 3 මහේස්ත්‍රාත් අධිකරණයට ඉදිරිපත් කර තිබේ. එහිදී පෙරේදා (25) දක්වා තරුණයා රක්ෂිත බන්ධනාගාරගත කර ඇත. අධිකරණයෙන් ඔහුට ඇප ලැබිමෙන් පසු සිය පියා සහ සහෝදරිය සමග අධිකරණ භූමියෙන් පිටතට පැමිණි අවස්ථාවේදී සිසුවියගේ පියා ඒ අයට උල් ආයුධයකින් ඇන ඇතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ අජිත් රෝහණ මහතා සඳහන් කළේය.
එම පිහි ඇනුමෙන් මියගොස් ඇත්තේ ජී.ඒ. ජේසීලන් නමැති 61 වියැති තරුණයාගේ පියාය. ඇඩොන් නිරෝෂන් නමැති තරුණයාත් දිලීෂා නමැති විසිතුන් වියැති තරුණයාගේ සහෝදරියත් තුවාල ලබා කොළඹ ජාතික රෝහලට ඇතුළත් කර ඇති බව පොලීසිය සඳහන් කරයි.
මුත්තයියා සෙල්වරාජ් නමැති පනස්එක් වියැති සිසුවියගේ පියා සැකපිට කෙසෙල්වත්ත පොලීසිය මගින් අත්අඩංගුවට ගෙන පරීක්ෂණ පවත්වාගෙන යනු ලබන බව අජිත් රෝහණ මහතා සඳහන් කළේය.
