මේ වන විටත් සිද්ධිය සම්බන්ධයෙන් පොලිස් මූලස්ථානය විමර්ශනයක් ආරම්භ කර තිබේ.
කෙසේ වෙතත් මේ වන විට කොළඹ ඇතුළු දිවයිනේ ප්‍රදේශ ගණනාවකින් මෙවැනි සිද්ධීන් වාර්තා වී තිබෙන අතර කුරුණෑගල නගරයේ ප්‍රධාන පාසල් කිහිපයකින්ම මෙවැනි සිදු වීම් වාර්තා වී ඇතැයි පොලිසිය පවසයි. කොළඹ නගරයේ ප්‍රධාන පාසලක දරුවකුගේ පියකුට පාසලේ නියෝජ්‍ය විදුහල්පතිවරයා ලෙස කතා කර දරුවා හදිසියේ අසනිප වී නෙවිල් ප්‍රනාන්දු රෝහලට ඇතුළත් කළ බවත්, හදිසි ශෛල්‍යකර්මයක් සඳහා මුදල් අවශ්‍ය බවත් දන්වා තිබිණි. අදාළ දරුවාගේ පියා නීතිඥවරයකු වන අතර ඔහු මේ සම්බන්ධයෙන් පළමුව පාසලෙන් විමසා සිටි අවස්ථාවේ එවැන්නක් සිදුව නොමැති බව දැනගන්නට ලැබී තිබේ.
තවද කුරුණෑගල නගරයේ ප්‍රධාන බාලිකා විදුහලක ඉගෙනුම ලබන සහෝදරියන් දෙදෙනකුගෙන් එක් අයකු පාසල් නොපැමිණි අතර අනෙක් සහෝදරිය පාසල් ගොස් තිබුණි. ඔවුන්ගේ පියා කුරුණෑගල බැංකුවක සේවය කරන අතර නිවසේ සිටි දියණිය ඔහුට ඇමතුමක් ගෙන කියා තිබුණේ පාසල් ගිය තම නැඟණිය හදිසියේම රෝගාතුරව සිටින බවට පාසලේ ගුරුවරයකු විසින් දුරකතනයෙන් දැනුම් දුන් බවයි.
මේ හා සමානම සිද්ධීන් මේවනවිටත් දිවයිනේ ප්‍රදේශ රැසකින් වාර්තාවී තිබේ. මෙම වංචාකාරි කල්ලිය ලබා දෙන දුරකථන පණිවිඩවලට රැවටී කලබලයට පත්ව තොරතුරු සොයා නොබලා මුදල් ලබා දී ඇති පුද්ගලයන් සිටින බව ද තවත් අය දරුවන් පිළිබඳ සොයා බැලීම සඳහා පාසල් කරා ගිය අවස්ථාවේ දී ඔවුන්ගේ නිවෙස් බිඳ සොරකම් කළ අවස්ථාද වාර්තා වී තිබේ.
කෙසේ වෙතත් පොලිසිය ජනතාව වෙත දැනුම් දෙන්නේ පාසල් ගිය දරුවා රිය අනතුරකට, හදිසි අනතුරකට, හදිසි රෝගී තත්ත්වයකට පත් වූ බව පවසමින් මෙම කල්ලිය දුරකතන ඇමැතුම් ලබා දෙන බැවින් දැඩි කල්පනාවෙන් පසුවන ලෙසත් එවැනි දුරකතන ඇමතුම් ලැබුණහොත් වහාම පොලිසිය දැනුවත් කරන ලෙසයි.
