ණය ප්‍රතිව්‍යුහගතකරණය හා ජාත්‍යන්තර මූල්‍ය අරමුදලේ සහාය ලබා ගැනීම පිළිබඳව විදෙස් තානාපතිවරුන් දැනුවත් කිරීමට ජනාධිපති රනිල් වික්‍රමසිංහගේ ප්‍රධානත්වයෙන් අද (සැප්. 22) පස්වරුවේ ජනාධිපති කාර්යාලයේ පැවති සාකච්ඡාවේ දී ඔවුන් මේ බව සඳහන් කර ඇත.
පැරිස් සමාජය (Paris Club) සහ පැරිස් සමාජයට අයත් නොවන රටවල් 23කට අයත් තානාපතිවරුන් මෙම සාකච්ඡාව සඳහා එක්ව සිටි තිබේ.
ශ්‍රී ලංකාව මුහුණ දී ඇති මෙම තත්ත්වයෙන් මිදීමට සිය පූර්ණ සහය ලබා දෙන බව එහිදී සඳහන් කර ඇති විදෙස් තානාපතිවරුන්, කඩිනමින් මෙම අර්බුදයෙන් මිදීමට ශ්‍රී ලංකාවට හැකිවනු ඇති බවට ද විශ්වාසය පළ කළ කර ඇත.
එහිදී අදහස් දැක්වූ ජනාධිපති රනිල් වික්‍රමසිංහ සඳහන් කර ඇත්තේ, ශ්‍රී ලංකාවට තිබෙන එක ම අභියෝගය මෙම ආර්ථික අර්බුදය බව ත්, එය අනාගත පරපුර වෙනුවෙන් ජය ගැනීම සිය අපේක්ෂාව බව ත් ය.
ණය ප්‍රතිව්‍යුහගතකරණය සම්බන්ධයෙන් වූ සාකච්ඡා මෙම වසර අවසන් වන විට සම්පූර්ණයෙන් ම අවසන් කිරීමට බලාපොරොත්තුවන බව ද ජනාධිපතිවරයා ප්‍රකාශ කර ඇත.
විදෙස් තානාපතිවරුන් වෙත සිය ස්තුතිය පිරිනමා ඇති ජනාධිපති රනිල් වික්‍රමසිංහ වැඩිදුරට ත් සඳහන් කර ඇත්තේ, රජය සෑම අවස්ථාවක ම විනිවිදභාවයෙන් හා සමානාත්මතාවයෙන් කටයුතු කරන බව ය.
මුදල් අමාත්‍යංශයේ ලේකම් මහින්ද සිරිවර්ධන සහ මහ බැංකු අධිපති ආචාර්ය නන්දලාල් වීරසිංහ මෙහිදී වර්තමානයේ ලංකාවේ ආර්ථික තත්ත්වය සහ ණය ප්‍රතිව්‍යුහගතකරණය පිළිබඳ පසුබිම් වාර්තාවක් ඉදිරිපත් කර තිබේ.
රංජිත් සියඹලාපිටිය, තාරක බාලසූරිය, ෂෙහාන් සේමසිංහ යන රාජ්‍ය අමාත්‍යවරුන් සහ ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක, ජනාධිපති කාර්ය මණ්ඩල ප්‍රධානී සාගල රත්නායක, විදේශ කටයුතු අමාත්‍යංශයේ ලේකම් අරුණි විජේවර්ධන යන මහත්ම මහත්මීන් සහ රාජ්‍ය නිලධාරීන් මෙම අවස්ථාවට එක්ව සිට ඇත.
