වී ගොවීන්ට ඉහළ මිලක් වී සඳහා දීමට කෘෂිකර්ම අමාත්‍ය මහින්ද අමරවීර මහතා විසින් පෙරේදා (15) අමාත්‍ය මණ්ඩලය වෙත අමාත්‍ය මණ්ඩල පත්‍රිකාවක් ඉදිරිපත් කරනු ලැබූ අතර වී අලෙවි මණ්ඩලය මඟින් වී අස්වනු මිල දී ගැනීම සඳහා පත් කළ අනුකමිටුවේ උපදෙස් මත අද (17) දින සිටම වී මිල දී ගැනීමට අමාත්‍ය මණ්ඩලය මඟින් අනුමැතිය දුන් බව කෘෂිකර්ම ඇමැති මහින්ද අමරවීර මහතා පවසයි.
ඒ අනුව වී අලෙවි මණ්ඩලය මඟින් වී මිල දී ගැනීම අද (17) දින සිටම ආරම්භ කෙරෙන අතර මේ යටතේ නාඩු වී කිලෝවක් රු.120කටත්, සම්බා වී කිලෝවක් රු.125කටත්, කීරි සම්බා වී කිලෝවක් රු.130කටත් මිල දී ගැනීමට කටයුතු යොදා ඇත. මේ වන විට වෙළෙඳපොළේ වී කිලෝවක මිල රු.90කටත් වඩා අඩු වී ඇති බවට ගොවි ජනතාව මැසිවිලි නඟන අතර එම කාරණය සැලකිල්ලට ගනිමින් ගොවීන්ගේ වී නිෂ්පාදනවලට උපරිම මිලක් දීම සඳහා වී අලෙවි මණ්ඩලය මැදිහත් වන බවත්, පළමු අදියර යටතේ රු. මි. 2000ක් වැය කර වී මෙ.ටො. 30,000ක් මිල දී ගැනීමට අපේක්ෂිත බවත්, සහල් නිෂ්පාදකයන් විසින් ගොවීන්ගෙන් වී කුණු කොල්ලයට මිල දී ගැනීම වැළැක්වීම සඳහා මේ පියවර ගත් බවත් ඇමැතිවරයා කියයි.
කෘෂිකර්ම අමාත්‍යාංශයේ පැවති සාකච්ඡාවකදී ඇමැතිවරයා මේ කරුණු අනාවරණය කළ අතර මේ අවස්ථාවට වී අලෙවි මණ්ඩලයේ සභාපති නීල් ද අල්විස්, උප සභාපති දුමින්ද ප්‍රියදර්ශන මහත්වරු ද සහභාගි වූහ.
