කොරෝනා හේතුවෙන් බිඳ වැටුණු සංචාරක කර්මාන්තය දැන් ක‍්‍රමයෙන් යථා තත්ත්වයට පත් වෙමින් පවතින බවයි අමාත්‍යාංශය පවසන්නේ.

ඒ අනුව මෙම වසරේ ජනවාරියේ සිට මේ දක්වා සංචාරකයන් 45,413 ක් මෙරටට පැමිණ ඇති අතර ඉන් 7,096 ක් ඔක්තෝබර් 01 සිට ඔක්තෝබර් 13 දක්වා පැමිණ ඇත. ඉන්දියාව, කසකස්තානය, ජර්මනිය, යුක්රේනය, ඇමරිකා එක්සත් ජනපදය, චීනය, කැනඩාව, ප‍්‍රංශය සහ රුසියාව යන රටවලින් මෙම සංචාරකයන් දිවයිනට පැමිණ තිබේ.

කොවිඩ් 19 වසංගත තත්ත්වය නිසා ශ්‍රී ලංකාවේ ආර්ථිකයට එය ගෙන ආවේ සුළුපටු හානිකර තත්ත්වයක් නොවේ. අපේක්ෂිත වූ සංචාරකයන්ගේ පැමිණීමේ ප්‍රතිඵල ඒ අයුරින්ම ලබාගැනීමට නොහැකි වීමෙන් සංචාරක හෝටල් හිමියන් මෙන්ම ඒ ආශ්‍රිත රැකියා කරා යොමුව සිටින්නන් ද බරපතළ ගැටලු රාශියකට මුහුණ දුන්හ. පෞද්ගලික වශයෙන් ඔවුන් එයට මුහුණ දුන්න ද අවසන් වශයෙන් එම ගැටලුව බාර වූයේ ශ්‍රී ලංකාවේ ආර්ථිකයටය. 2018 වසරේදී ශ්‍රී ලංකාවට පැමිණි සංචාරකයන් ප්‍රමාණය මිලියන 2.33 ක් වන අතර, ඔවුන් මෙරටට රැගෙන ආ විදේශ විනිමය ප්‍රමාණය දළ වශයෙන් අමෙරිකානු ඩොලර් බිලියන 4.5 කට ආසන්නය. නමුත් ඉන්පසු වසරේදී පාස්කු ප්‍රහාරය නිසා සංචාරක කර්මාන්තයෙන් ලැබෙන ආදායම අහිමිව ගිය අතර, 2020 වසර තුළ ද සිදුවුණේ ඒ හා සමානවම කොවිඩ් වසංගතයෙන් අප රටට ලැබිය යුතු ආදායම් මාර්ග ඇහිරී යෑමය. එහෙත් වත්මන් ආණ්ඩුව මෙවන් වසංගත තත්වයක් තුළ ජනතාවගේ ජිවිත පිළිබදවද වගකීමෙන් කටයුතු කරමින් රටේ සංචාරක කර්මාන්තය යථා තත්වයට ගනිමින් ඇති බව පෙනී යයි. මෙය රටක් ලෙස මෙන්ම රටක ජනතාව ලැබූ ජයග්‍රහණයක් ලෙස සැලකිය හැකිය.

-පංචාලි