ඔහු පෙන්වා දෙන්නේ ළමුන් සම්බන්ධ නඩු කඩිනමින් විභාග කිරීම සඳහා එමඟින් අපේක්ෂා කරන බවය.
දරුවන් සම්බන්ධ නීතී රැසක් සංශෝධනය කිරීමට ද පියවර ගනිමින් සිටින බව ද අධිකරණ අමාත්‍ය අලි සබ්රි මහතා සඳහන් කළේය.
"අපි විවිධ පාර්ශවයන් එකතු කරගෙන දරුවන් සම්බන්ධයෙන් පවතින නීතිමය තත්ත්වය වැඩිදියුණු කිරීමට කටයුතු කරනවා. එමඟින් අපි බලාපොරොත්තු වෙන්නේ දරුවන් සම්බන්ධයෙන් පවතින නඩු වඩා ප්‍රගතිශීලි පරිසරයක දරුවන්ටම වෙන්වු උසාවියක සිට සාක්ෂි දීමේ ක්‍රමවේදයක්, ඒ නඩු හඳුනාගෙන ඉක්මනින් ඉවර කිරීමේ ක්‍රමවේදයක් සකස් කරලා තියෙනවා. එහෙම වුණාම පොදුවේ ලංකාව තුළ දරුවන් සම්බන්ධයෙන් වු නීතියේ විශාල ප්‍රතිසංස්කරණ රාශියක් සිදුකරගෙන යනවා. අවුරුදු 18ට වඩා අඩු තරණයින් ට මරණ දඬුවම දීම අපි නීතියෙන් වෙනස් කරලා තියෙනවා. මොකද ඒ දරුවන්ට යළි අවස්ථාවක් ලබාදීම සඳහා ජාත්‍යන්තර පද්ධතිය හා සමාන. ඒ ඇරුණම ළමා විවාහ සම්පූර්ණයෙන් ම මේ රටේ තුරන් කිරීම සඳහා අදාළ නීති ප්‍රතිසංස්කරණ ගෙන යමින් පවතිනවා."
මේ අතර දරුවන් සම්බන්ධ නඩු විභාගයන් පිළිබඳව මහජන ආරක්ෂක අමාත්‍ය රියර් අද්මිරාල් සරත් වීරසේකර මහතා ද ඊයේ (01) කොළඹ පැවති උත්සවයකදී අදහස් පළ කරමින් සඳහන් කර සිටියේ, අපයෝජනයට ලක්වු දරුවන් එම සිදුවීම් පැමිණිලි කිරීමේ ක්‍රියාවලිය තුළ කිහිප වතාවක් අපයෝජනයට ලක්වන බැවින් එම සාක්ෂි වීඩියෝ තාක්ෂණය මඟින් ලබාගෙන උසාවියට ඉදිරිපත් කිරීම ට බලාපොරොත්තු වන බවය.
එම උත්සවයට සහභාගී වූ ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතාද ළමුන්ට සිදුවන විවිධ අපයෝජන සම්බන්ධයෙන් මෙලෙස පැහැදිලි කළේය.
"ළමයින්ට වෙන අපරාධ අතර බහුලව සිදුවන්නේ, ලිංගික අතවර. අද අපිට තියෙන ප්‍රධානම අභියෝගය තමයි සයිබර් අවකාශය තුළ ළමයින්ට සිදුවන ලිංගික අපයෝජන.එක් අතකින් ළමා අපචාර වළැක්වීමට මෙන්ම අනෙක් පැත්තෙන් අපරාධකරුවන්ට ඉතා ඉක්මනින් දඬුවම් කිරීමේ ක්‍රමවේදයක් සකස් කරන්න නීතිපතිවරයා සමඟ කථා කරලා වැඩපිළිවෙලක් සකස් කරනවා." යනුවෙන් සදහන් කර ඇත.
- පංචාලි අබේසේකර
