ඒ අනුව සෘජුවම ඉන්දියාවෙන් සීනි ආනයනය කිරීමේ විශේෂ බලපත්‍ර 05ක් ‘මහා පරිමාණ’ සහ ‘විශාල’ ව්‍යාපාර වෙත ලබාදීමට කටයුතු කර ඇත.

2020 වසරේ ජුනි මාසයේදී මෙරටට සීනි ආනයනය කිරීමට වැයකර ඇති මුදල එක්සත් ජනපද ඩොලර් මිලියන 12.9කි (රුපියල් කෝටි 237.4ක්). එම අගය සියයට 100කට වඩා වර්ධනය කරමින් මෙම වසරේ (2021) ජූනි මාසයේදී ඩොලර් මිලියන 23.8ක් (රුපියල් කෝටි 480.6ක්) වැයකරමින් සීනි ආනයනය කර ඇත.

මේ අතර මෙම වසරේ (2021) පළමු මාස 06 ඇතුළත මෙරටට සීනි ආනයනය කිරීම වෙනුවෙන් ඩොලර් මිලියන 206.7ක් වැයකර ඇත. පසුගිය වසරේ (2020) එම කාල සීමාවේදී මෙරටට සීනි ආනයනයට වැය කර ඇති මුදල ඩොලර් මිලියන 116,කි. ඒ අනුව පෙර වසරට වඩා සියයට 77.6ක මුදලක් වැයකර ආනයනකරුවෝ මෙම වසරේ පළමු අර්ධයේදී මෙරටට සීනි ගෙන්වා තිබේ.

2021 ජුනි 22දා සිට බල පැවැත්වෙන පරිදි සීනි ආනයනය අත්හිටුවීමට රජය කටයුතු කළේ රටේ පවතින ඩොලර් සංචිත හිඟය හේතුවෙන් සහ රටේ අවශ්‍යතාවට වඩා වැඩි සීනි තොගයක් පවතින බව සලකා බැලීමෙන් අනතුරුවය.
2020 ඔක්තෝබර් 14 වැනි දින සිට රජය සීනි සඳහා එතෙක් පැවැති රුපියල් 50ක වෙළෙඳ භාණ්ඩ බද්ද අහෝසි කර ශත 25ක නාමික බද්දක් පනවන ලදී. එදිනට මෙරට සීනි මිල ආසන්න වශයෙන් රුපියල් 135 ලෙස සටහන් වූ අතර එය රුපියල් 85 දක්වා අඩුකිරීම රජයේ අරමුණ විය. ඉන් අනතුරුව මෙරටට සීනි ආනයනය කරන ලද්දේ නව ශත 25ක බද්ද යටතේ රුපියල් 49.75ක ලාභයක් ද සමගය.

-පංචාලි අබේසේකර