ඒ අනුව ශ්‍රී ලංකා පොදුජන පෙරමුණේ ජාතික ලැයිස්තු මන්ත්‍රී ධුරයේ පුරප්පාඩුවක් ඇති වී තිබෙන බව පාර්ලිමේන්තුවේ මහ ලේකම්වරයා මැතිවරණ කොමිසමේ සභාපතිවරයාට ලිඛිතව දැනුම් දීමට පියවර ගනු ලැබීය.
ජයන්ත කැටගොඩ මහතා වසර 2000දී පළමුව කොළඹ දිස්ත්‍රික්කය නියෝජනය කරමින් පාර්ලිමේන්තුවට තේරී පත්වූ අතර පසුව එම පාර්ලිමේන්තුව විසුරුවා හැර වසර 2001දී පැවති මැතිවරණයේදීද පාර්ලිමේන්තුවට තේරී පත්විය.
අනතුරුව ඔහුට 2011 වසරේදීද පාර්ලිමේන්තු මන්ත්‍රී ධුරයක් හිමිවූ අතර ඉන් පසු වසර 2020දී ශ්‍රී ලංකා පොදු ජන පෙරමුණේ ජාතික ලැයිස්තු මන්ත්‍රීවරයෙක් ලෙස පාර්ලිමේන්තුවට තේරී පත්විය. එතුමා ඉල්ලා අස්වන තෙක් ආණ්ඩු පක්ෂයේ නියෝජ්‍ය සංවිධායක ධුරයද දැරූ අතර 09 වන පාර්ලිමේන්තුවේ මහජන පෙත්සම් පිළිබඳ කාරක සභාවේ සහ මහාමාර්ග කටයුතු පිළිබඳ අමාත්‍යාංශයීය උපදේශක කාරක සභාවේ සාමාජිකයෙකු ලෙසද කටයුතු කළේය.

මේ අතර ජයන්ත කැටගොඩ මහතා ඉල්ලා අස්වීමෙන් වන පුරප්පාඩුවට බැසිල් රාජපක්ෂ මහතා පත්කිරීමට නියමිත බව පොදුජන පෙරමුණේ ලේකම් සාගර කාරියවසම් මහත පවසා සිටී. ඒ අනුව එළඹෙන 8 වෙනිදා බැසිල් රාජපක්ෂ මහතා පාර්ලිමේන්තු මන්ත්‍රීවරයකු ලෙස දිවුරුම් දීමට නියමිත අතර ඔහුට මුදල් හා ආර්ථික සංවර්ධන ඇමැතිධුරය හිමි වන බවත් දේශපාලන ආරංචි මාර්ග පවසයි.