මාධ්‍යවේදීන්ට අදහස් දක්වමින් මේ බව ප්‍රකාශ කළ මන්ත්‍රීවරයා රජය විසින් සෙසු දෙමළ දේශපාලන සිරකරුවන්ද නිදහස් කිරීමට පියවර ගත යුතුව ඇති බව පැවසීය.
තවදුරටත් අදහස් දක්වමින් මන්ත්‍රීවරයා මෙසේද කියා සිටියේය.
''දෙමළ දේශපාලන සිරකරුවන් නිදහස් කර ගැනීමේ ප්‍රශ්නය දෙමළ ජාතික සන්ධානයේ සටන් පාඨයක් බවට පත් වුණා. ඒ සටන පක්ෂයක් විදිහට ගෙන යද්දී දෙමළ දේශපාලන සිරකරුවන්ගේ ඥාතීන් වෙනම සංවිධානය වුණා. මේ සිරකරුවන් නිදහස් කර ගැනීම සඳහා වෙනම ස්වේච්ඡා ව්‍යාපාරයකුත් බිහිවුණා.අවසානයේදී මේ සියලුම ඉල්ලීම්වල ප්‍රතිපලයක් වශයෙන් රජය දෙමළ දේශපාලන සිරකරුවන් දාසය දෙනකු නිදහස් කිරීමට පියවර ගනු ලැබුවා.
දෙමළ වැසියන්ගේ ප්‍රශ්නවලට රජයත් ජනාධිපතිවරයාත් මැදිහත් වන බව සිතා ගැනීමට මේක හොඳ අවස්ථාවක් වෙනවා. කිළිනොච්චියේ සුදාහරන් කියන දෙමළ දේශපාලන සිරකරුවාගේ බිරිය මියගියා. ඔහුගේ කුඩා දරුවන් දෙදෙනා තනි වුණා. ඔවුන්ට ආරක්ෂාවක් නැති වෙලාවේ බොහෝ ස්වේච්ඡා සංවිධාන එවකට පැවති යහපාලන රජයෙන් ඉල්ලා සිටියේ මානුෂීය හේතූන් මත ඔහුව නිදහස් කරන ලෙසයි. නමුත් එවැන්නක් සිදු වුණේ නෑ. ඒ අවස්ථාවේදී ජාත්‍යන්තරය පවා ඔහුව නිදහස් කරන ලෙස ඉල්ලා සිටියා. ඒත් ඒ අවස්ථාවේ සිදු නොවූ දේ මේ ජනාධිපතිවරයා විසින් සිදු කිරීම ගැන පළාතේ මන්ත්‍රීවරයා හැටියට මම සතුටු වෙනවා.යනුවෙන්ද ශ්‍රීධරන් මන්ත්‍රීවරයා මෙහිදී පැවැසීය.
-දිනමිණ
