එසේම කොවිඩ් ආසාදිත කම්කරුවන්ට වැටුප් සහිත නිවාඩු ලබාදිය යුතු බව ද එම මධ්‍යස්ථානය කම්කරු කොමසාරිස්ගෙන් ඉල්ලා සිටියි.
වතු සමාගම් විවිධ අසාධාරණ කොන්දේසි පනවමින් රුපියල් දහසේ වැටුප කප්පාදු කිරීමට කටයුතු කරන බවත් දිනකට නෙළිය යුතු තේ දලු ප්‍රමාණය අසාධාරණ ලෙස හිටිහැටියේ ඉහළ දමා ඇති බව මෙකී මධ්‍යස්ථානයේ සංවිධායක ලේකම් වසන්ත අබේකෝන් පැවසීය.
සමාගම් කියන තේ දලු ප්‍රමාණය ලබා නොදෙන කම්කරුවන් සඳහා දින භාගයක වැටුපක් පමණක් ලබාදීමට වතු සමාගම් කටයුතු කරන බවත් ඔවුන් ඉල්ලා සිටින නිෂ්පාදන ඉලක්ක සපුරා දීමට ඉතාමත් දුෂ්කර බවත් ඔහු කීය.
සංවිධායක ලේකම්වරයා පෙන්වා දුන්නේ වසංගත සමග අසරණව සිටින කම්කරුවන්ට වතු සමාගම් මගින් එල්ල කරන පීඩනය දරාගත නොහැකි බවත් මේ වන විට දවසේ වැඩ කළයුතු කාලය ද නිවාඩු දිනවලදී වැඩ කිරීමේදී ඒ වෙනුවෙන් ලබාදෙන අමතර දීමනාව ද ගෙවීම නතර කර ඇති බවය.
වසංගතය උපයෝගී කර ගනිමින් වතු සමාගම් මෙලෙස කම්කරුවන්ව වෙහෙසට පත් කිරීම මානුෂීය නොවන බව ද ඔහු පැවසුවේය.
-අරුණ
