ඇය ඒ බව කියාසිටියේ කොළොන්න ඇරැපෝරෝව, පහලවලකඩ හා දික්වෙල කඩුවෙමැද මාදන විදුලි යෝජනා ක‍්‍රම ජනතා අයිතියට පත්කිරීම වෙනුවෙන් පැවති උත්සවයකදීය.

 '' ලංකා විදුලිබල මණ්ඩලය අවුරුදු ගණනාවක් පාඩු ලබන ආයතනයක් බවට පත්වෙලා තිබුණා. කෝප් කමිටුව හැමදාම කෝප් වාර්තාවේ අසාදු ලේඛනයේ පාඩු ලබන ආයතනයක් බවට ලංකා විදුලි බලමණ්ඩලය දමා තිබුණා. අද ලංකා විදුලිබල මණ්ඩලය ගිය අවුරුද්දේ ලාභයි, මේ අවුරුද්දෙත් යම් ලාභයකට යාවි. එම නිසා එලෙස පාඩු ලබන ආයතන ලාභ ලබන ආයතන බවට පත් කිරීමට අද අපේ රජය සමත් වෙලා තියෙනවා.'' යයි ඇය එහිදී කියා සිටියාය. 


කෙසේවෙතත් ලංකා විදුලිබල මණ්ඩලය මෙම වසරේ මේ දක්වා කාලයේදී අපේක්‍ෂා කළාටත් වඩා වැඩි පාඩුවක් ලබා ඇතැයි අමාත්‍ය පාඨලී චම්පික රණවක මහතා මීට පෙර කියාසිටියාය.  විදුලිබල හා බලශක්ති හිටපු අමාත්‍යවරයාද වන ඔහු ඒ බව පැවසුවේ තමන් විසින් රචිත 'බලය සහ බලය' කෘතිය එළිදැක්විම සදහා ඉකුත් 5 වනදා පැවැත්වූ උත්සවයකදීය.


'' මහජන උපයෝගීතා කොමිසමට භාරදුන් ලංකා විදුලිබල මණ්ඩලයේ පුරෝකථනයෙන් මේ මාස හයේ මිලියන 7400ක පාඩුවක් අපේක්ෂා කර තිබෙනවා. නමුත් එය මිලියන 21000දක්වා වැඩි වී තිබෙනවා. ඒ වැඩිවීමට හේතුමොනවද? කවුද ඒකට වගකියන්නේ. කවුද ඒ පාඩුව දරන්න යන්නේ. දැනටමත් ගාස්තු වැඩිකිරීම් මගින් ඉන්ධන ගැලපුම් ගාස්තුව මගින් මිලියන 25000ක් පමණ ලංකා විදුලිබල මණ්ඩලය අමතර වශයෙන් ලබාගෙන තිබෙනවා. එසේ තිබියදීත් මේක පාලනය කරන්න බැරි වී තිබෙන්නේ ඇයි? විදුලිබල මණ්ඩලය පාඩුයි කියන්නේ විදුලි බලමණ්ඩලයේ කවුරුත් ගෙවන්න යන්නේ නැහැ  ඕවා. අවසාන වශයෙන් ජනතාවයි ගෙවන්නේ. '' යයි ඇමතිවරයා එහිදී පැවසිය.