ඒ මහතා මේ බව සඳහන් කළේ පෙරේදා (26) කොළඹ පැවැති උත්සවයකදීය. එහිදී වැඩි දුරටත් අදහස් දැක් වූ ඇමැතිවරයා කියා සිටියේ. වතුකරයේ ජනතාවගේ දෛනික වැටුප රුපියල් දහසක් කිරීමේ වැඩපිළිවෙළ බොහෝම අමරුවෙන් ඉටුකර තිබෙන බවයි. කැබිනට් අනුමැතියත් ලැබුණා. වතු හාම්පුතුන් හා වෘත්තීය සමිති අතර සාමුහික ගිවිසුම් ඇති කරන්න අප පුළුවන් තරම් උත්සහ කළා. නමුත් ගැටලු මතු වුණා. එවැනි ගිවිසුමක් අස්සන් කරන්න නම් එම දෙපාර්ශ්වයම එකඟත්වයකට පත්විය යුතුයි. එසේ එකඟ නොවුණු නිසා පඩිපාලක සභාව තුළින් මෙම වැටුප ලබා දෙනවා මිස මට වෙනත් විකල්පයක් තිබුණේ නැහැ. නමුත් මේ දෙපාර්ශ්වයටම සාමුහික ගිවිසුමකට එන්න තවමත් විවෘතයි.

කෙසේ නමුත් පඩිපාලක සභාව මඟින් මෙම තීරණයට එළැඹීමත් සැක සහිත බව ඇතැමුන් පෙන්වා දෙයි. ඊට හේතුව පඩි පාලක සභාවේ වෘත්තිය සමිති නියෝජිතයෝ 8ක්, හාම්පුතුන් 8ක් හා ඇමති පත්කළ 3ක් සිටින බැවින් කුමන තීරණයක් ගනීවිදැයි දැන්ම පැවසීමේ හැකියාවක් නොමැති බැවිණි. අනිත් කරණය මෙම පුවත් වාර්තාවේ සඳහන් වන පරිදි කැබිනට් අනුමැතිය ලබාදී ඇත්තේ දිනක අවම වැටුප 1000කිරීමට මිස දිනක මූලික වැටුප 1000 කිරීමට නොවේ. දිනක අවම වැටුප 1000 කිරීම යනු මූලික වැටුප දැන් තිබෙන මට්ටම්මේම තබා වතු කම්කරු ජනතාවට ලේසියෙන් ලබාගත නොහැකි දීමනා සහ ඔවුන්ගේ හිමිකමක් වන අර්ථසාධක අරමුදල් ද ඔවුන්ගේ වැටුප් ලෙස සළකා කරන රැවටීමක් විය හැකි බවටද මත පෙළව තිබේ. වතු හාම්පුතුන් රජයේද සහය ඇතිව මෙතෙක් කලක් කරමින් සිටියේද එයයි. නමුත් වතු කම්කරු ජනතාව එයට විරුද්ධ වෙමින් දැන් වසර 6ක කාලයක සිට තමන්ගේ දෛනික මූලික වැටුප 1000කරන ලෙස ඉල්ලා සිටියි.