මෙම තොරතුරු අනාවරණය වී ඇත්තේ තැපැල් රේගු වැටලීම් අංශයේ රඳවාගෙන තිබූ පාර්සල් දෙකක්‌ ඊයේ (08 දා) විවෘත කිරීමේදීය. මෙම පාර්සල් දෙක විවෘත කිරීමේදී එතුළ තිබී ඇත්තේ කොන්ක්‍රීට්‌ ගල් කුට්‌ටි සහ පත්‍ර මිටියකි.
ඩුබායි සිට ශ්‍රී ලංකාවට මත්කුඩු සහ රත්රන් ගෙනෙන ලද ජාවාරම්කරුවන් තැපැල් දෙපාර්තමේන්තුවේ සහ රේගු වැටලීම් අංශයේ සිටින දූෂිත නිලධාරීන් සමග එකතු වී මත්කුඩු සහ රත්රන් තැපෑලෙන් පිටකර එම පාර්සල් දෙක තුළට කොන්ක්‍රීට්‌ ගල් සහ පුවත්පත් මිටියක්‌ ඇතුළත් කර ඇති බව පෙනී යන බව තැපැල් වෘත්තීය සමිති නායකයෝ රැසක් පැවසූහ.
මෙම සැක සහිත පාර්සල් දෙක ඩුබායි සිට ශ්‍රී ලංකාවට රැගෙන විත් තිබෙන්නේ 2014 වසරේ මැයි මාසයේදීය. නමුත් මෙම පාර්සල් දෙක විවෘත කරනු ලැබුවේ අගෝස්‌තු මස 08 වැනිදාය. (ඊයේ දිනයේය)
එම නිසා වහාම මේ පිළිබඳව විධිමත් පරීක්‍ෂණයක්‌ පවත්වා රටට සත්‍යය හෙළිදරව් කළ යුතු බවද තැපැල් වෘත්තීය සමිති නියෝජිතයෝ අවධාරණය කරති.
මේ පිළිබඳව මධ්‍යම තැපැල් හුවමාරු මධ්‍යස්‌ථානයේ අධිකාරී ආර්. ඩේවිට්‌ මහතාගෙන් විමසූ විට ඒ මහතා පැවසුවේ සිද්ධිය පිළිබඳව විධිමත් පරීක්‍ෂණයක්‌ පවත්වන බවයි.
පාර්සල් තුළ තිබුණේ මොනවාදැයි යන්න පිළිබඳව තමන්ට ස්‌ථිරවම ප්‍රකාශ කළ නොහැකි බවද ඔහු පැවසීය.
(දිවයින)
