එමෙන්ම ජාතික ජන බලවේග ප්‍රතිපත්ති ප්‍රකාශයේ IMF වැඩසටහන නැවත සමාලෝචනය කරන බව පැහැදිලිව දක්වා තිබෙන අතර මේ වන විට සාර්ථකව ක්‍රියාත්මක ආර්ථික ප්‍රතිසංස්කරණයන් ගනනාවක්ම වෙනස් කිරීම් ගැන යෝජනා ද අඩංගුව ඇත. එසේම ඔවුන් විශාල වශයෙන් පොරොන්දු වී තිබෙන රාජ්‍ය රැකියා සහ බදු අඩු කිරීම් සිදු කිරීමේ දී සිදුවන ආදායම් අහිමි වීම් සහ වියදම් වැඩි වීම මත ආර්ථිකය නැවත බිඳ වැටීම වළක්වා ගැනීම පිළිබඳ පැහැදිලි දැක්මක් ඉදිරිපත් කිරීම ද සිදුකර නොමැත.

මේ අතර පසුගිය දා දෙරණ 360 වැඩසටහනට එක් වෙමින් අනුර කුමාර දිසානායක මහතා තමාගේ විකල්ප ආර්ථික වැඩසටහන නිසි පරිදි පැහැදිලි කිරීමට අපොහොසත් වීමත් නිසා මෙම අවධානම සීඝ්‍රයෙන් ඉහළ යන බව විශ්ලේෂකයින් විසින් වැඩිදුරටත් පෙන්වා දෙනු ලබයි. එම වැඩසටහනේදී මාධ්‍යවේදීයා විමසූ පැනයකට අපහසුවෙන් පිළිතුරු දුන් අනුර දිසානායක මහතා ප්‍රකාශ කරන ලද්දේ අසාර්ථක වීමක් සිදුවුවහොත් එය අත්හැර නව වැඩපිළිවෙළක් පිළිබඳව සිතා බලන බවකි.

නව වැඩපිළිවෙළක් තමන්ට නොමැති නම් ඔවුන් විසින් කළ යුතු වන්නේ වර්තමාන වැඩපිළිවෙළ පවත්වාගෙන යාම මිස එය සමාලෝචනය කිරීම නොවන බව පෙන්වා දෙන ජාත්‍යන්තර විශ්ලේශකයින් 2023 වසරේ එනම් පසුගිය වසරේ ජනතා විමුක්ති පෙරමුණේ මැයි දින තෙක්ම ඔවුන්ගේ ප්‍රධාන සටන් පාඨයක්ව තිබුණේ 'IMF මර උගුල පරදවමු' යන්න බවත් පෙන්වා දෙයි.

එ් අනුව ජනතාවගේ ඡන්දය දිනාගැනීම සඳහා ඔවුන් දැන් IMF භීතිකාව සෘජුව ප්‍රකාශ නොකළත් ජවිපෙ අභ්‍යන්තර ප්‍රතිපත්තිය අනුව කිසිසේත් IMF ව්‍යාපෘතිය ඔවුන් ඉදිරියට ගෙන නොයනු ඇති බවට විශ්ලේෂකයින් විස්වාසය පලකරයි. ඒ අනුව එසේ වුවහොත් මෙම ආර්ථික ස්ථාවරත්වය බිඳ වැටීමට නියමිත බව ඔවුන් පෙන්වා දෙයි.

2017-2019 කාලසීමාවේ දී ද මංගල සමරවීර, රනිල් වික්‍රමසිංහ රජය විසින් සිදුකරමින් තිබූ IMF ප්‍රතිසංස්කරණ නිසා විදේශ සංචිත ඩොලර් බිලියන 7.2 ක් දක්වා වැඩි වීම, ප්‍රථමික ගිණුමේ අතිරික්තයක් වාර්තා කරගෙන තිබූ පසුබිමක ගෝඨාභය රාජපක්ෂ රජය විසින් අත්තනෝමතික ලෙස වැට් බදු අඩුකර රාජ්‍ය සේවය ඉහල නංවා සිදුකළ අතාර්කික ක්‍රියාවලිය නිසාම ආර්ථිකය බිඳවැටුණු අයුරින්ම ජාතික ජන බලවේගය බලයට පත්වුවහොත් 2025/26 වසරවල දී ආර්ථිකය බිඳවැටීමකට ලක්විය හැකි බව එම විශ්ලේෂකයන් විසින් වැඩිදුරටත් පෙන්වා දෙනු ලබයි.

එසේ වුවහොත් ශ්‍රී ලංකාව දකුණු ආසියාවේ ලෙබනනය බවට පත්වනු ඇතැයි ඔවුන් වැඩිදුරත් අනතුරු අගවනවා. ලෙබනනය මේ වනවිට දරුණුම ආර්ථික කඩා වැටීමකට සහ අර්බුද ගණනාවකටම මුහුණ දෙන ලොව ඛේදනීයම රාජ්‍යයක් බවට පත්ව තිබේ.