ප්‍රථමයෙන් ජනප්‍රිය නිළි සේමිණි ඉද්දමල්ගොඩ, ජනප්‍රිය නිළි දමිතා අබේරත්නට එරෙහිව කොළඹ දිසා අධිකරණය හමුවේ නඩුවක් ගොනු කරනු ලැබුවාය. රුපියල් කෝටි 50ක වන්දියක් ඉල්ලා එම නඩුව පවරා තිබුණි. එයට හේතුව වූයේ පෞද්ගලික ගුවන් විදුලි නාලිකාවක සම්මුඛ සාකච්ඡාවකදී තම චරිතය ඝාතනය වන ලෙස ප්‍රකාශ නිකුත් කිරීමට එරෙහිවය.
සේමිණි ඉද්දමල්ගොඩගේ එම පැමිණිල්ල මගින් තම චරිතයටද අපහාසයක් වූ බව පවසමින් රුපියල් කෝටි 100ක වන්දියක් ඉල්ලා දමිතා අබේරත්නද ඇයට එරෙහිව නඩු පවරන ලදී.
කොළඹ දිසා අධිකරණයේදී ඊයේ (14) මෙම නඩුව කැඳවූ අවස්ථාවේදී සේමිණි ඉද්දමල්ගොඩ වෙනුවෙන් පෙනී සිටි නීතිඥවරු අධිකරණයට දන්වා සිටියේ දමිතා අබේරත්න විසින් නැවත අපහාසාත්මක ප්‍රකාශ මාධ්‍යයට නොදෙන්නේ නම් කොන්දේසි සහිතව නඩුව ඉල්ලා අස්කර ගැනීමට කැමති බවය.
දමිතා අබේරත්න වෙනුවෙන් පෙනී සිටි නෙවිල් අබේරත්න නීතිඥවරයා අධිකරණයට දන්වා සිටියේ කිසිදු අවස්ථාවක අපහාසාත්මක ප්‍රකාශ නිකුත් නොකළ බැවින් කොන්දේසිවලට එකඟ නොවන බවයි. අනතුරුව දෙපාර්ශ්වය නඩුව සමථයකට පත්කර ගැනීමට එකඟ වූහ.
