එම මුදල් වහාම ක්‍රියාත්මක වෙන පරිදි ලබා දීමට ජනාධිපතිවරයා මේ වනවිට එකඟ වී තිබේ. එම ඉඩම්වල පිහි‍ටුවා තිබෙන හමුදා කඳවුරු වෙනත් ස්ථානවලට ගෙන යාම සහ ඒ වෙනුවෙන් වන ඉදිකිරීම් කටයුතු සඳහා මෙම මුදල ඉල්ලා ඇත.

කෙසේ නමුත් උතුරේ ඉඩම් නිදහස් කිරීම සම්බන්ධයෙන් වත්මන් ආණ්ඩුව උතුරේ ජනතාවට පෙරොන්දු වී තිබු අතර එයින් වැඩි කොටසක් පසුගිය කාලයේ නිදහස් කරනු ලැබීය. එහෙත් තවත් ඉඩම් අක්කර 2211 ක ප්‍රමාණයක් ආරක්ෂක හේතූන් මත කිසිසේත්ම නිදහස් කිරීමට නොහැකි බව හමුදාව පවසා තිබේ. නිදහස් කළ හැකිව තිබෙන්නේ ඉඩම් අක්කර 385 ක් පමණක් බවත් ඉන් 203 ක් නිදහස් කිරීමට ඉහත කී මුදල් අවශ්‍ය බව පවසා ඇත. මේ තත්වය මත ජනාධිපතිවරයා උතුරේ සියලු ඉඩම් නිදහස් කර දෙමින් උතුරු පළාත් ජනතාවගේ වීරයා වන්නට කළ සැළස්මද අසාර්ථක වී තිබේ.

මෙම ඉඩම් ප්‍රමාණය නිදහස් කිරීම සම්බන්ධයෙන් පසුගිය වසරකට වැඩි කාලයක් මුලුල්ලේ හමුදාව මුදල් සම්බන්ධ ගනු දෙනුව කතා කළද ජනාධිපතිවරයා ඊට එකඟව තිබුනේ නැත. රුපියල් බිලියන 2.5 කට ආසන්න මුදල් මේ වෙනුවෙන් ලබාදීමට අදිමදි කළ අතර ඊට තවත් හේතුවක් වී තිබුනේ රාජපක්ෂ පාර්ශ්වයෙන් එල්ල වන ජාතිවාදි චෝදනා වලින් ගැලවී සිටීමට අවශ්‍ය වීමය. දැන් එම රාජපක්ෂලා ගැටළුවක් නැත.

කෙසේ නමුත් මේ හදිස්සියෙම මෙම ඉඩම් නිදහස් කිරීම සඳහා ජනාධිපතිවරයා තීන්දු කර ඇත්තේ වත්මන් දේශපාලන අර්බුදය හමුවේ දෙමළ ජාතික සන්ධානයේ සහය ලබා ගැනීමත් දකුනේ ජනතාවගේ අප්‍රසාදයට ලක්ව සිටින ඔහුට උතුරු පලාත් ජනතාවගේ ප්‍රසාදය දිනා ගැනීම වෙනුවෙනුත් බවත් පැහැදිලිය.

මේ අතර යුද්ධයෙන් උන්හිටි තැන් අහිමි කරන ලද උතුරු නැගෙනහිර ජනතාවගේ නැවත පදිංචිය හා ගොඩනැගිලි ප්‍රතිසංස්කරණ කටයුතු සඳහා යෙදවිය යුතු මුදල් රජයේ ආරක්ෂක අංශ වල අවශ්‍යතා සඳහා යොදාගැනීම ගැන දෙමළ ජාතික සන්ධානය විරෝධය පළකර තිබේ.