විධායක ජනාධිපති ධුරය අහෝසි කොට එම ධුරයට හිමි බලතල පාර්ලිමේන්තුවට සහ ස්‌වාධීන කොමිෂන් සභාවලට පැවරීමට අවශ්‍ය ආණ්‌ඩු ක්‍රම ව්‍යවස්‌ථා සංශෝධනය සිදු කිරීම සම්බන්ධයෙන් අග්‍රාමාත්‍ය රනිල් වික්‍රමසිංහ මහතා සමග මේ වන විටත් සාකච්ඡා කොට අවසන් බවද ජනාධිපතිවරයා සඳහන් කළේය.
දැනට පවතින මනාප මැතිවරණ ක්‍රමය අහෝසි කොට නව මැතිවරණ ක්‍රමයක්‌ ඉතා ඉක්‌මනින් හඳුන්වාදීමට කටයුතු කරන බව කී ජනාධිපතිවරයා එවිට නිදහස්‌ හා සාධාරණ මැතිවරණ පැවැත්වීමටත් දූෂණයෙන් සහ වංචාවෙන් තොර ජනතා නියෝජිතයන් පත්කර ගැනීමටත් ජනතාවට හැකි වනු ඇතැයි විශ්වාසය පළ කළේය.
මැතිවරණ, අධිකරණ, රාජ්‍ය සේවා, මානව හිමිකම් ඇතුළු ස්‌වාධීන කොමිෂන් සභා පිහිටුවීම මගින් ශ්‍රී ලංකාව ලෝකයේ දියුණු රටවල පවතින පාලන ක්‍රමවලට සමාන තත්ත්වයට පත්ව තිබෙන බව ද මෛත්‍රීපාල සිරිසේන මහතා සඳහන් කළේය.
ජනාධිපති මෛත්‍රීපාල සිරිසේන මහතා මේ බව සඳහන් කළේ විදෙස් ගත ශ්‍රී ලාංකිකයන් 2000 ක්‌ සඳහා ද්විත්ව පුරවැසි සහතික පත් ප්‍රදානය කිරීම නිමිත්තෙන් අරලියගහ මන්දිරයේ දී ඊයේ පැවැති උත්සවයට සහභාගි වෙමිනි.
divaina
