ගෝඨාභය රාජපක්ෂ මහතා මේ දිනවල විදේශ ගතව සිටින බැවින් ඔහු යලි දිවයිනට පැමිණි වහාම එසේ ප්‍රශ්න කිරීමට සැරසෙන බව පොලිස් ආරංචි මාර්ග පවසයි.
එක්නැළිගොඩ මහතා අතුරුදහන් කිරීමට අදාළ පරීක්‍ෂණ අවසන් අදියරට පැමිණ තිබෙන බවද ඊට සම්බන්ධ යුද හමුදාවේ තවත් ජ්‍යෙෂ්ඨ නිලධාරීන් කිහිප දෙනකු ඉදිරියේදී අත්අඩංගුවට ගැනීමට නියමිතව ඇතැයි ද එම ආරංචි මාර්ග සඳහන් කරයි.
මෙම අතුරුදහන් සිද්ධිය සම්බන්ධයෙන් යුද හමුදා කර්නල්වරු දෙදෙනකු ඇතුළු එකොළොස්‌ දෙනකු මේ වනවිට අපරාධ පරීක්‍ෂණ දෙපාර්තමේන්තුවේ රඳවාගෙන ප්‍රශ්න කරගෙන යයි.
මෙතෙක්‌ කළ පරීක්‍ෂණවලින් හෙළිවී ඇති අන්දමට ප්‍රදීප් එක්නැළිගොඩ මහතා මරණිය චේතනාවෙන් යුතුව කුමන්ත්‍රණකාරී ලෙස පැහැරගෙන ගොස් ඇත්තේ, යුධ හමුදා බුද්ධි අංශයේ ප්‍රබලයින් පිරිසක් විසින් බව තහවුරුවී ඇත.
විවිධ පාර්ශ්වයන්ගෙන් බලපෑම් :
මේ අතර, එක්නැළිගොඩ මහතා පැහැරගෙන යාමේ සිද්ධිය සම්බන්ධව කෙරෙන පරීක්‍ෂණ කටයුතු වලට විවිධ පාර්ශ්වයන්ගෙන් අපරාධ පරීක්‍ෂණ දෙපාර්තමේන්තුව වෙත දැඩි බලපෑමක් එල්ලවෙමින් පවතී.
කෙසේවුවද, එක්නැළිගොඩ සිද්ධිය සම්බන්ධයෙන් අපක්‍ෂපාතී පරීක්‍ෂණයක්‌ පවත්වා ඊට සම්බන්ධ අපරාධකරුවන් තරාතිරම නොබලා අත්අඩංගුවට ගෙන ඔවුනට එරෙහිව නීතිය ක්‍රියාත්මක කරන ලෙස ජනාධිපති මෛත්‍රීපාල සිරිසේන මහතා අපරාධ පරීක්‍ෂණ දෙපාර්තමේන්තුවට උපදෙස්‌ දී තිබේ.
මේ අතර 'සත්හඬ' පුවත්පත අද (18) වාර්තා කර ඇත්තේ, මාධ්‍යවේදී ප‍්‍රගීත් එක්නැළිගොඩ මහතා රජයේ හමුදා බුද්ධි අංශ මඟින් පැහැරගෙන ගොස් සොරිවිල (මනම්පිටිය) වැලිකන්ද ප‍්‍රදේශයේ පවත්වාගෙන ගිය අතුරු හමුදා කඳවුරකට බාර දී ඇති බවත් පසුව ඔහු ඝාතනය කර මෘත දේහය ත‍්‍රිකුණාමලයට රැගෙන ගොස් මුහුදට දමා ඇති බවත් ය.
