කෙසේ වුවත් පක්ෂය වෙනුවෙන් වැඩි මෙහෙයක් සිදු කිරීමේ අදිටනිනි යුත් මෛත්‍රීපාල සිරිසේන ජනාධිපතිවරයා සිය හිතවාදීන්ට ආසන සංවිධායක වැනි ධුර පිරිනමා හෝ විශාල ඡන්ද ප්‍රමාණයන් අහිමි වී යාම වළක්වා ගැනීමට කටයුතු යෙදීමක්ද සිදුකරමින් පවතී.
අලියා ලකුණින් යුතු "යහපාලනය සඳහාවූ එක්සත් ජාතික පෙරමුණ" නම් පෙරමුණෙන් මැතිවරණයට ඉදිරිපත් වීමට මෙම පිරිස සූදානම්වීම සමග වත්මන් ජනිධිපතිවරයා කළබලයට පත්ව මෙම තීරණය වෙනස්කරවීමට උත්සාහ කළද දූෂිතයන්ට නාම යෝජනා ලබා දීම අත් හි‍ටුවීමෙන් හැර වෙනත් කිසිදු ක්‍රමයකින් ඔවුන්ගේ තීරණය වෙනස් කිරීම අසීරු වී ඇත.
මෙම තීරණය මල්ඵල ගැන්වීම උදෙසා මොවුන් සියලු දෙනාම ලබන 14 වැනිදා මහනුවරින් ආරම්භ කරන එක්සත් ජාතික පක්ෂයේ මහ මැතිවරණ මංගල රැලියට සහභාගිවීමට නියමිතය.
මෙම මහින්ද විරෝධීන් එජාපයට පැමිණෙන්නේ නම් ඔවුන් පිළිගැනීමට එජාප නායකත්වය ද ඉතා කැමැත්තෙන් පසුවන අතර ඒ සඳහා විවිධ මට්‌ටමින් සාකච්ඡා ද සිදුකෙරිණි.
මහින්ද විරෝධී පිරිස නියෝජනය කරනු ලබන දිස්‌ත්‍රික්‌කයන්හි එජාප නාමයෝජනා අවසන් නොකොට තබා ගැනීමට ද එජාපය කටයුතු කර තිබූ අතර මෙම පිරිස 20 දෙනකු හෝ ඊට වැඩි වෙතැයි එජාපය ඊයේ (10 ) සවස්‌ වන විට ගණන් බලා තිබිණි.
පවතින වාතාවරණය අනුව ගිරයට හසුවූ පුවක්ගෙඩියක් බදුව සිටින ජනාධිපතිවරයා නිවැරදි තීරණයක් ගැනීමට පසුබට වනවා විනා වෙනත් පියවරක් නොගැනීම කණගාටුදායක තත්වයකි. පක්ෂය රැකීමට යයි සිතා දූෂිතයන්ට අවස්ථාව ලබා දීම තුළ අවසානයේ පක්ෂය රැක ගැනීම කෙසේ වෙතත් ජනතාවිරෝධයක ඇගිලි දිගුවනු ඇත්තේ ජනපතිවරයාටමය. පක්ෂය රැකීම කෙසේ වෙතත් දැන් දැන් පක්ෂයේ මුල් පුරුක් පවා අහිමිවී යාම ආරම්භව ඇත.නමුත් මෙය ආරම්භයක් පමණි.ඇටි කෙහෙල් කෑවා නම් විදවිය යුතුමය.
