ඊයේ පැවැත්වූ මාධ්‍ය සාකච්ඡාවකදී එම පක්ෂයේ මාධ්‍ය ප්‍රකාශකවරයා මෙසේ පැවසීය.,
"..‘කෝටි 5400කට වැඩි මේ රටේ මහජන මුදල් අමු අමුවේ කොල්ලකාපු, මහා භාණ්ඩාගාරය ශුද්ධ කරපු, ඒ පිළිබඳව වගකිවයුතු යැයි කෝප් කමිටු වාර්තාවේ නම සඳහන් අගමැති රනිල් වික්රමසිංහ මහත්තයාට නාමයෝජනා ලබානොදෙයි’ කියලා. දැන් තියෙන්නේ පිරිසිදු එක්සත් ජාතික පක්‍ෂයක්නේ. චෝදනාවලට ලක්වූවන්ට නාමයෝජනා දෙන්නේ නැහැනේ. එහෙමනම් ‘පිරිසිදු එජාපයෙන්’ නාමයෝජනා රනිල් වික‍්‍රමසිංහටත් ලැබෙන්නේ නැහැ.
ඒ විතරක් නොවෙයි, වත්තල ප‍්‍රාදේශීය සභාවට කඩා වැදිලා මැර බලය පෙන්වපු, ක‍්‍රිස්තියානි කටයුතු අමාත්‍යාංශයේ වාහන යොදාගෙන සේරුවාවිල ප‍්‍රදේශයේ නිදන් හාරපු, ජෝන් අමරතුංගට ‘පිරිසිදු එජාපයේ’ නාමයෝජනා ලැබේවි කියලා අපි හිතන්නේ නැහැ. ඒ වගේම තඹ කන්ටේනරයක් මුදාගැනීමට බලපෑම් කළ බවට චෝදනා ලබපු සුජීව සේනසිංහට ‘පිරිසිදු එජාපයෙන්’ නාමයෝජනා ලබාදෙයි කියලා අපි හිතන්නේ නැහැ.
තවද භුවල්කා සමාගමෙන් කප්පම් ඉල්ලපු පාලිත රංගේ බණ්ඩාරට ‘පිරිසිදු එජාපයෙන්’ නාමයෝජනා ලැබේවි කියලා අපි හිතන්නේ නැහැ. ඒ වගේම කරුංකා ප‍්‍රතිඅපනයන භාණ්ඩයක් බවට පත් කරලා කරුංකා කන්ටේනර් රේගුවෙන් නිදහස් කරන්න බලපෑම් කරපු රවී කරුණානායකට පිරිසිදු එජාපයෙන් නාමයෝජනා ලැබේවි කියලා අපි හිතන්නේ නැහැ. ඌව පළාතේ වැලි තොටවල් එජාප හිතවතුන්ට ලබා දුන්නු බවට චෝදනා තියෙන හරින් ප‍්‍රනාන්දුට ‘පිරිසිදු එජාපයෙන්’ නාමයෝජනා ලැෙබිවි කියලා අපි හිතන්නේ නැහැ. මුදල් විශුද්ධිකරණ පනත උල්ලංඝනය කරමින් සමෘද්ධි මුදල් තම හිතවතුන්ට බෙදා දුන්නු සජිත් පේ‍්‍රමදාසට ‘පිරිසිදු එජාපයෙන්’ නාමයෝජනා ලැබේවි කියලා අපි හිතන්නේ නැහැ.
බැඳුම්කර සුදාලාට, නිදන් සුදාලාට, තඹ සුදාලාට, වැලි සුදාලාට, කරුංකා සුදාලාට, සමෘද්ධි සුදාලාට ‘පිරිසිදු එජාපයෙන්’ නාමයෝජනා ලබාදෙයි කියලා අපි හිතන්නේ නැහැ. නාමයෝජනා භාරදෙන දිනයේදී මේ චෝදනාවලට ලක්වූවන්ට නාමයෝජනා නොදී ‘අපි පිරිසිදුයි’ කියලා ඔප්පු කිරිමේ ඉඩකඩ එජාපයට දැන් ලැබී තිබෙනවා..."
මෙහිදී කිසිදු තැනක දූෂණ වංචා අක්‍රමිකතා චෝදනා එල්ල වී ඇති හා එම චෝදනා ඔප්පු වූ කිසිදු සන්ධාන මන්ත්‍රීවරයකු ගැන සඳහන් නොවෙතත් ඔහුගේ තර්කය වන්නේ එජාපය මුන්ට දෙනවා නම් අපේ උන්ට නොදී සිටීම සාධාරණ නැති බවය.
