අමාත්‍යවරයා පෙන්වා දෙන්නේ වසර 12ක කාලයක් මෙරට ආර්ථිකයට සිදු කළ හානිය සම්බන්ධයෙන් වගකිව යුත්තා වෙනුවට වෙනත් පාර්ශ්ව සමග විවාද කිරීමට නොහැකි බවයි.
ඊයේ පැවැති මාධ්‍ය හමුවක දී පාර්ලිමේන්තු මන්ත්‍රී බන්ධුල ගුණවර්ධන මහතා පළ කළ අදහස්වල පිළිතුරු දෙමින් උතුරු කොළඹ දේශපාලන පක්ෂ කාර්යාලයේ පැවැති උත්සවයක දී අමාත්‍යවරයා මේ බව කියා සිටියේ ය.
මෙහි දී අමාත්‍යවරයා අතින් ආබාධිත පුද්ගලයකු වෙත රෝද පුටුවක් පරිත්‍යාග කිරීම ද සිදු විය. වියලි ආහාර ලබා දීමේ අවස්ථාවකට ද අමාත්‍යවරයා එහි දී එක් විය.
වැඩි දුරටත් අදහස් දැක් වූ අමාත්‍යවරයා කියා සිටියේ වසර 12ක් තිස්සේ ආණ්ඩුවේ හිතවතුන්ට පමණක් ලැබුණ ආර්ථික ප්‍රතිලාභ මේ වන විට සියලු ජනතාව වෙත ගලා යමින් තියෙන බවයි.
පැවැති කොල්ලකාරී ආර්ථික රටාව සම්පූර්ණයෙන් වෙනස් කර ආණ්ඩුව ජනතාවාදී ආර්ථිකයක් නිර්මාණය කරමින් සිටින මොහොතේ ඊට අකුල් හෙළීම ඇතැමුන් සිය දේශපාලනය බවට පත් කරගෙන ඇති බව අමාත්‍යවරයා පෙන්වා දෙයි.
වසර දොළහක් තිස්සේ රටේ ආර්ථිකය බංකොලොත්භාවයට පත් කිරීමට කටයුතු කළා පමණක් නොව ආර්ථිකය එම තත්ත්වයෙන් මුදා ගන්නට වත්මන් ආණ්ඩුව කටයුතු කරන මොහොතේ ඊට ද අකුල් හෙළීම ද ඔවුන්ගේ අවශ්‍යතාව වී ඇතැයි අමාත්‍යවරයා වැඩි දුරටත් සඳහන් කළේ ය.
