කොළඹ අභයාරාම විහාරස්ථානයේදී මාධ්‍යවේදීන් ඇමතූ ඩලස් අලහප්පෙරුම මන්ත්‍රීවරයා, එක්සත් ජාතීන්ගේ වාර්තාව නිකුත් වී රටේ ජනමතය පාලනය කර ගැනීමට නොහැකි වනු ඇතැයි එක්සත් ජාතික පක්ෂය බියට පත්ව සිටින බව පැවසීය.
මෙම ප්‍රකාශයෙන් පැහැදිලිවන්නේ රාජපක්ෂවාදීන් ලබන සැප්තැම්බර් මාසය දක්වා මහ මැතිවරණය කල් දමා ගැනීමේ අපේක්ෂාවෙන් පසුවන බවය. එක්සත් ජාතීන්ගේ මානව හිමිකම් කොමිසමේ වාර්තාව සැප්තැම්බරයේ නිකුත් වන අතර එහිදී නියත ලෙසම ශ්‍රීලංකාවේ මානව හිමිකම් කඩ කිරීම වලට හා යුධ අපරාධවලට සම්බන්ධ වූවන්ට එරෙහිව එක්සත් ජාතීන් පියවර ගනු ඇති බවට මේවන විටත් හෙළිව පවතී.
එම තත්වයන් තුල රාජපක්ෂ වාදීන්ට නැවත වතාවක් විදුලි පු‍ටුව කරේ තබාගෙන ජාතිවාදය වපුරුවමින් මහ මැතිවරණයට ඉදිරිපත් වීමේ හැකියාව තිබේ. 20 වන වයවස්ථා සංශෝධය සම්මත කරගැනීමට ඉඩ නොදී ඒ කල් යවමින් පාර්ලිමේන්තුව විසුරුවා හැරීම ප්‍රමාද කරගැනීමේ හේතුව මෙයය.
නෝර්වේ හිටපු සාම නියෝජිත එරික් සොල්හයිම් කළ බව පැවසෙන ප්‍රකාශයක් උපුටා දක්වන අලහප්පෙරුම හිටපු අමාත්‍යවරයා, එම වාර්තාව මගින් ශ්‍රී ලාංකිකයන් 40 දෙනකු වැරදි කරුවන් ලෙසින් නිගමනය කර තිබෙන බව සඳහන් කළේය.ඒ අතර සිවිල් පුරවැසියන් කිහිපදෙනෙකු සිටින බවද මන්ත්‍රීවරයා පවසයි. නම නොකීවද මන්ත්‍රීවරයා මේ පවසන්නේ රාජපක්ෂවරු ගැනය. ඒ අනුව රාජපක්ෂවරුන්ට එරෙහිව යුධ අපරාධ චෝදනා එල්ලවූ විට ඊට එරෙහිව ව්‍යාජ ජනමතයක් ඇති කර ගැනීම රාජපක්ෂවාදීන්ගේ උපක්‍රමය බව පැහැදිලිය.
කෙසේ නමුත් යළිත් වතාවක් සිංහල වර්ගවාදය පතුරුවා හැරීමට ගන්නා මේ කුමන්ත්‍රණකාරි පියවර පරාජය කිරීමට සිහි බුද්ධියක් ඇති සියලු පුරවැසියන්ගේ වගකීම විය යුතුය.
