ඒ අනූව දිවිනැගුම දෙපාර්තමේන්තුවේ මූල්‍ය අක්‍රමිකතා සම්බන්ධයෙන් අත්අඩංගුවට ගෙන රක්ෂිත බන්ධනාගාර ගත කර සිටින හිටපු ආර්ථික සංවර්ධන අමාත්‍ය බැසිල් රාජපක්ෂ ඇතුළු චෝදනාවට ලක්ව සිටින සෙසු තිදෙනා ද ලබන 18 වැනිදා දක්වා රිමාන්ඩ් කිරීමට කඩුවෙල මහේස්ත්‍රාත් ධම්මික හේමපාල මහතා විසින් නියෝග කර ඇත.
බැසිල් රාජපක්ෂ මහතා සමඟ එම අමාත්‍යාංශයේ හිටපු ලේකම් වෛද්‍ය නිහාල් ජයතිලක, දිවිනැගුම දෙපාර්තමේන්තුවේ හිටපු අධ්‍යක්ෂ ආර්.කේ.කේ.ඒ.රණවක එම දෙපාර්තමේන්තුවේ හිටපු අතිරේක අධ්‍යක්ෂ ජනරාල් බන්දුල තිලකසිරි යන මහත්වරුන් මෙලෙස රිමාන්ඩ් කර ඇත.
දිවි නැඟුම දෙපාර්තමේන්තුවේ මුදල් අයථා පරිහරණය කිරීමේ චෝදනාව මත මූල්‍ය අපරාධ කොට්ඨාසය විසින් පසුගිය අප්‍රේල් මස 22වෙනි දින හිටපු ආර්ථික සංවර්ධන ඇමැති බැසිල් රාජපක්ෂ අත්අඩංගුවට ගන්නා ලදී.
