ඝන වනාන්තර අක්‌කර 2500 ක් සහ පරිවාර කැලෑ ඉඩම්, හොර ඔප්පුවකින් ලියාගෙන සිදුකරනු ලබන මෙම විනාශය වහා නතර නොකළ හොත් ජාතික වශයෙන් මෙන්ම ගෝලීය වශයෙන් දරුණු පරිසර ව්‍යසනයකට මුහුණ දීමට සිදුවනු ඇතැයි ද ඔවුහු ප්‍රකාශ කරති.
මේ පිළිබඳව අදහස්‌ දැක්‌වූ පරිසර සංරක්‍ෂණ භාරයේ අධ්‍යක්‍ෂ සජීව චාමිකර මහතා කියා සිටියේ රජයේ වනාන්තර, රජයේ අනුදැනුම ඇතිව විනාශයට ලක්‌ කෙරෙන මෙම සිදුවීම් තේ වගාව සඳහා ඉංග්‍රීසීන් විසින් උඩරට වනාන්තර විනාශ කිරීම හා සමාන, ඉන්පසු සිදුවන විශාලතම වන විනාශය බවය.
කල්ලාරු - පෙරියමඩු වනාන්තර විනාශය සියවසේ දැවැන්තම වනාන්තර හානිය වශයෙන් හඳුන්වා දෙන දුම්බර මිතුරෝ පරිසර හා සංස්‌කෘතික සංගමයේ ලේකම් නෙවිල් මීවතුර මහතා කියා සිටින්නේ මෙය ගෝලීය පාරිසරික අපරාධයක්‌ වන බවයි.
ජාත්‍යන්තර පරිසරවේදීන්ගේ සහ සංරක්‍ෂණවේදීන්ගේ අවධානය මෙම වනාන්තර විනාශය කෙරෙහි යොමු විය යුතු බව පරිසරවේදීන්ගේ අදහසයි.
පසුගිය රජය සමයේදී වන සංරක්‍ෂණ දෙපාර්තමේන්තුව මගින් නැවත පදිංචිකිරීමේ කාර්ය සාධක බළකාය මගින් අත්පත් කරගත් වනාන්තර අක්‌කර 2500 ක මෙම දැව හෙළීම සිදුවන අතර මෙහි යෝජිත සිලාවතුර - විල්පත්තු අලි ප්‍රවේශ මාර්ගය ද වේ.
පසුගිය රජයේ ආර්ථික සංවර්ධන අමාත්‍යාංශය මගින් හඳුනාගත් වනජීවී රක්‍ෂිත ගැසට්‌ කිරීම වළක්‌වාලීම මෙම විනාශයට ප්‍රබල හේතුවක්‌ වූ බව ද පරිසරවේදීහු කියා සිටිති.
divaina
