ප්‍රවෘත්ති සාකච්ඡාව සඳහා සහභාගී වන මෙන් මාධ්‍ය ආයතන වලට දැන්වීමෙන් අනතුරුව යම් කිසි පුද්ගලයකු තමාට දුරකතනයෙන් කතා කර ප්‍රවෘත්ති සාකච්ඡාව නොපවත්වන ලෙස මරණීය තර්ජන කළ බව සුනිල් ජයසේකර මහතා පැවසිය.
ඉරණම
ප්‍රවෘත්ති සාකච්ඡාව පැවැත්වීම එල්ටීටීඊ ඩයස්පෝරාවට හා ශ්‍රී ලංකාවේ දෙමළ අන්තවාදයට කරන අනුග්‍රහයක් ලෙස හඳුන්වා ඇති තර්ජනය කළ පුද්ගලයා වැඩි දුරටත් කියා ඇත්තේ සාකච්ඡාව පැවැත්වුවොත් රටින් පිටවීමට පෙර අනෙකුත් මාධ්‍යවේදීන්ට අත් වූ ඉරණම ඔහුටත් අත් වනු ඇති බවයි.
මාධ්‍ය හමුවෙන් අනතුරුවත් දිගින් දිගටම මරණ තර්ජන එල්ල වූ බව සුනිල් ජයසේකර මහතා කියා සිටියේය.
තර්ජනය කර පැමිණි දුරකථන ඇමතුම් හා ඒවායේ දුරකථන අංක ඇතුළුව මෙම සිදුවීම් මාලාව සම්බන්ධයෙන් ලිඛිත ප්‍රකාශයක් පොලිස්පතිවරයාට ලබා දෙන බව නිදහස් මාධ්‍ය ව්‍යාපාරයේ ලේකම් සුනිල් ජයසේකර මහතා වැඩිදුරටත් පැවසුවේය.
(බිබිසි සංදේශය)
