ශ්‍රී ලංකාවට කිලෝ මීටර් 500 - 700 අතර දුරකින් පිහිටි මෙම නවතම භූතල විභේදන කලාපයේ බලපෑම සුළුවෙන් තැකිය නොහැකි බව මහාචාර්ය සී. බී. දිසානායක අවධාරණය කරයි.
මෙම නවතම භූ තලය විභේදනය වීම ඇරඹෙන්නේ වසර මිලියන 50 කට පමණ පෙර සිට බවත් ඉදිරියටත් වසර මිලියන දහයක්‌ දක්වා පැවතිය හැකි බවත් ඔහු පවසයි. භූ තලය විභේදනය වීමට පෙර අස්‌ථායි භූ කලාපයක්‌ නිර්මාණය වෙනවා. එහිදී විශාල ප්‍රදේශයක්‌ පුපුරා ඉරිතලා යනවා. ඉන්දු - ඔස්‌ටේ්‍රලියානු භූ තලයේ මෙම ඉරිතැලීම් පටන්ගෙන ඉවරයි. ශ්‍රී ලංකාවේ කඳුකරයේ සිදුවන නායයැම්වලට මින් විශාල බලපෑමක්‌ ඇතිවිය හැකියි යනුවෙන් ඔහු සදහන් කරයි.
'නේපාලයේ සිදු වූ කම්පනය හේතුවෙන් ඉන්දියාව අභ්‍යන්තරයේ පීඩන ඇතිවෙන්න පුළුවන්. ඉන් ශ්‍රී ලංකාවට බලපෑමක්‌ ඇතිවිය හැකියි. ඉදිරියේදී ශ්‍රී ලංකාවේ නායයැම් ඉහළ යා හැකියි. ශ්‍රී ලංකාවේ භූමි කම්පා වෙන්නේ නැහැ කියලා අපිට සැනසිල්ලේ ඉන්න බැහැ. මොකද අතීතයේ විශාල භූමිකම්පා අපේ රටේ ඇතිවෙලා තිබෙනවා. 1615 අප්‍රියෙල් 15 වැනිදා සිදුවූ දැවැන්ත භූමිකම්පාවකින් කොළඹ නගරයේ 200 ක් පමණ මියගොස්‌ ගොඩනැඟිලි රැසකට දැවැන්ත විනාශයක්‌ සිදුව තිබෙනවා. මෙම වාර්තා පෘතුගාලයේ සඳහන්ව තිබෙනවා' යනුවෙන් වැඩිදුරටත් කරුණු දක්වා අැත.
2012 වසරේ ඉන්දු-ඔස්‌ටේ්‍රලියානු භූ තලය ආශ්‍රිතව දැවැන්ත භූමිකම්පාවක්‌ සිදුවුණා. ඉදිරියේ දී මෙම භූ තල ආශ්‍රිතව දැවැන්ත භූ කම්පන සිදුවිය හැකියි. මේ දැවැන්ත භූ කම්පනයන්ට මුහුණ දීම සදහා දැන් සිටම ලංකාව සුදානම් වියයුතු බව සී. බී. දිසානායක මහතා සදහන්කරයි.
