ඊයේ පස්වරුවේ පැවති කැබිනට් රැස්වීමෙන් අනතුරුව ජනාධිපතිවරයා සහ අගමැතිවරයා වෙනම හමුවී මේ සම්බන්ධයෙන් සාකච්ඡා කොට තිබේ.
එහෙත් ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ඊයේ සවස පැවති කැබිනට් මණ්ඩල රැස්වීමේ දී ව්‍යවස්ථා සංශෝධනයට අදාළ විවාදයට තුඩු දී ඇති කරුණු කිසිවක් සාකච්ඡා නොවුණු බව දැන ගැනීමට තිබේ. කෙසේ නමුත් මෙම ව්‍යවස්ථා සංශෝධයනය සම්බන්ධයෙන් ජනාධිපතිවරයා ගේ අදහස තවමත් ප්‍රකාශ වී නැත.
එමෙන්ම ව්‍යවස්ථා සංශෝධනය සම්මත කරගැනීම සම්බන්ධයෙන් දැනට මතු වී ඇති ගැටලු නිරාකරණය කරගැනීම පිළිබඳ රනිල් වික්‍රමසිංහ මහතා සහ හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මැතිනිය අතර විශේෂ සාකච්ඡාවක් පසුගිය අඟහරුවාදා උදෑසන පැවති බවත් දේශපාලන ආරංචි මාර්ග සඳහන් කරයි.
එක්සත් ජාතික පක්ෂ සිය වගකීම ඉටු කරමින් ව්‍යවස්ථා සංශෝධන කෙටුම්පත ඉදිරිපත් කළ බවටත්, පාර්ලිමේන්තුවේ බහුතර ආසන සංඛ්‍යාවක් සහිත ශ්‍රී ලංකා නිදහස් පක්ෂය ප්‍රමුඛ සන්ධානය සිය වගකීම ඉටු කරමින් එය සම්මත කර ගැනීම සඳහා උදව් කළ යුතු බවත් අග්‍රාමාත්‍යවරයා හිටපු ජනාධිපතිනිය හමුවේ ප්‍රකාශ කළ බව දැන ගැනීමට තිබේ.
