හාර දහසක් පමණ වන මෙම කාර්ය මණ්ඩල සාමාජික සාමාජිකාවන් පසුගිය දිනවල අනියම් පත්වීම් ලබා සේවය කළ අතර මෙම පිරිස විදුලි බල සහ බල ශක්ති ඇමති පාඨලී චම්පික රණවක මහතාගේ උපදෙසින් ස්ථිර පත්විම ලදහ. ඒ අනුව මෙම පිරිස චම්පික රණවක මහතාගේ දේශනයකට සවන්දීම සඳහා මහරගම නාවින්න ප‍්‍රදේශයට ඇමතිවරයා විසින් අද (8) පස්වරු 1.30 ට කැඳවා තිබිණි.
මෙම පත්වීම් ස්ථිර කර තිබූ පිරිස අතර ලිපිකරු, විදුලි කාර්මික ඇතුළු විවිධ තාරාතිරම්වල අය සිටිති. ඇමතිවරයා ගේ මෙම නියෝගය අනුව දිවයිනේ විවිධ ප‍්‍රදේශවල සේවය කරන විදුලි බල මණ්ඩලයේ පිරිස මහරගමට පිටත් ව ගොස් ඇත. මහජන දිනය වන අද( 8 – බදාදා) දවස තුළ කාර්යාල සේවයෙන් බැහැර ගොස් සිටින නිසා මාසික විදුලි බිල් පත ගෙවිම නඩත්තු කටයුතු පිණිස සේවකයන් ලබා ගැනීම වැනි අත්‍යවශ්‍ය කටයුතු කිරිම පිණිස එකී කාර්යාලවලට පැමිණි මහජනතාව අපමණ වූ දුෂ්කරතාවන්ට මුහුණ දුන් බව කීහ.
හලාවත ප‍්‍රාදේශීය විදුලි ඉංජිනේරුවරයා යටතේ සේවය කරන පනහකට නොවැඩි පිරිසක් රාජකාරි නිවාඩු ලබා ඇමති දේශනයට සවන් දිම පිණිස අද ( 8 දා) මහරගම ගොස් තිබිණි. මෙම පිරිසට කොළඹ යාමට ලංකා ගමනා ගමන මණ්ඩයේ බස් රථ යොදා ගෙන තිබූ අතර ඊට විදුලි බල මන්ඩලය විසින් මුදල් ගෙවා ඇති බවත් කියයි.
මේ සම්බන්ධයෙන් විදුලි බල මණ්ඩලයේ වයඹ නියෝජ්‍ය සාමාන්‍යාධිකාරි ගේ‍්‍රෂන් මුතුකුඩ ආරචිචි මහතාගෙන් විමසු විට ඒ මහතා කියා සිටියේ ඇමති නියෝගය අනුව සේවකයන් මහරගම ගිය බවත් ඒ ගැන යමක් තමන්ට පැවැසිය නොහැකි බවත් ය.
colombopost
