පාසල් තුළ පරිගණක භාවිතය වැඩි කළ යුතු බවත් ආනන්ද, ඩී. එස්‌. ඇතුළු අනෙකුත් පාසල් සඳහාද ටැබ් පරිගණක ලබාදීමට රජය කටයුතු කරන බවද රාජකීය විද්‍යාලයේ නව ගොඩනැඟිල්ලක්‌ විවෘත කිරීමේ උත්සවයට සහභාගිවෙමින් අගමැතිවරයා වැඩිදුරටත් ප්‍රකාශ කළේය.
මෙරට අධ්‍යාපනයද දියුණුවන අනෙකුත් රටවල් සේ අනාගතයට ගැලපෙන පරිදි වෙනස්‌ කළ යුතු බවද කී අගමැතිවරයා ඒ සඳහා පරිගණක භාවිත මෙන්ම නව තාක්‌ෂණයද උපයෝගී කර ගනිමින් කටයුතු කළ යුතු බවත් කීය.
ලෝකයේ දියුණු වුණු රටවල පාසල් පංතිකාමරයක සිසුන් සංඛ්‍යාව 25 කට සීමා කර තිබෙන බවත් අපේ රටේ එම සංඛ්‍යාව අඩුම තරමේ 35 ට වත් ගෙන ආ යුතු බවත් හෙතෙම සඳහන් කළේය.
තමන් රාජකීය විද්‍යාලය තුළ අධ්‍යාපන ලබන කාලයේ සිදුවූ මිහිරි සිදුවීම් රැසක් පවතින බවද මෙහිදී සිහිපත් කළ අගමැති වික්‍රමසිංහ මහතා රට දියුණු කිරීමේදී දැනුම පදනම් කර ගනිමින් ඊට මුල්තැන දී කටයුතු කිරීම තම අභිප්‍රාය බවද වැඩිදුරටත් ප්‍රකාශ කළේය.
divaina
