එම සංගමයේ මාධ්‍ය අනුකමිටුවේ වෛද්‍ය චන්දන එපිටකටුව මහතා නිකුත්කළ නිවේදනයක එබව සඳහන්වේ.
එම නිවේදනය පහත පළවේ.
අප සංගමයේ භාරකරුවන් කටයුතු කළ යුත්තේ මධ්‍යම කාරක සභාවේ තීරණවලට අනුව මිස අත්තනෝමතිකව නොවන බව රජයේ වෛද්‍ය නිලධාරීන්ගේ සංගමයේ ව්‍යාවස්ථාවේ පැහැදිලිව දක්වා ඇත. ඒ අනුව මධ්‍යම කාරක සභාව ඒකමතිකව තීරණය කර ඇත්තේ සංගමයට අපහාස කළ සියලු දෙනාට විරුද්ධව විනයානුකූල පියවර ගැනීමයි.
වෛද්‍ය රංජනී ගමගේ රජයේ තනතුරු කිහිපයක් දරන නිසා ඇයගේ අපහාසාත්මක ප්‍රකාශය රජයේ ස්ථාවරය ලෙස වැරදි චිත්‍රයක් හුවා දැක්වීමට ඉඩ ඇත. රජය මානව හිමිකම් චෝදනාවලට ලක් වූ අවස්ථාවක ප්‍රබල වෘත්තීය සමිතිවල ප්‍රජාතන්ත්‍රවාදී තීරණවලට රජයේ බලපෑම් එල්ල කරන බවට චෝදනා ලැබීමට මෙම වෛද්‍යවරියගේ හැසිරීම හේතුවිය හැක.
එපමණක් නොව ඇයගේ වගකීමකින් තොර අපහසාත්මක ප්‍රකාශ නිසා ඉදිරියේ දී පැවැත්වීමට නියමිත මැතිවරණවලදි ද රජයට අවාසිදායක වීමට හේතු වනු ඇත. එම නිසා සාමාජිකත්වයෙන් 95% ඉක්ම වූ අතිබහුතරය වෙනුවෙන් අප අතිගරු ජනාධිපතිතුමාගෙන් ඉල්ලා සිටින්නේ මෙම වෛද්‍යවරියගේ වගකීමෙන් තොර ක්‍රියාකාලපය පිළිබඳ විනයානුකූලව කටයුතු කරන ලෙසයි.
රජයේ වෛද්‍ය නිලධාරීන්ගේ සංගමයට විරුද්ධව, සද්භාවයෙන් තොරව, කුමන්ත්‍රණකාරී සහ ද්වේශසහගත ලෙස වෛද්‍යවරු සුලු පිරිසක් ක්‍රියකරන බවට කොළඹ දිසා අධිකරණය 114/13 නඩු තීන්දුව මගින් ප්‍රකාශයට පත් කර ඇත. අප මීට පෙර පැවසුවේ ද සත්‍යය කවදා හෝ ජය ගන්නා බවයි.
අප සංගමයේ ව්‍යවස්ථාව අනුව සංගමය විනාශ කරන්නන් ලෙස තීන්දු වූ සාමාජිකයන්ගේ සාමාජිකත්වය අහෝසි කළ හැක. මේ අනුව සංගමය තුළ රැඳී සිටිමින් සංගමයට හානි කරන මෙම වෛද්‍යවරු කිහිප දෙනාට එසේ කිරීමට හැකි අවසන් කඩාකප්පල් ක්‍රියාව මෙය වනු ඇත. මේ අනුව මෙම පිරිසට මින් ඉදිරියේ දී සංගමයේ සාමාජිකයින් ලෙස පෙනී සිටිමින්, සංගමයේ විනාශය වෙනුවෙන් කටයුතු කිරීමට ඇති හැකියාව සම්පූර්ණයෙන් අහෝසි වී යනු ඇත.''
