මැතිවරණ කොමසාරිස්‌වරයා විසින් යෝජනා කර ඇති නව ක්‍රමය යටතේ ආසන 140 ක්‌ ආසන මට්‌ටමින් ජය ගන්නා පුද්ගලයන් මන්ත්‍රීවරුන් වශයෙන් පත්කෙරෙන අතර මනාප ක්‍රමය යටතේ දිස්‌ත්‍රික්‌ක මට්‌ටමින් මන්ත්‍රීවරු 80 දෙනෙක්‌ ද, ජාතික ලයිස්‌තුවෙන් මන්ත්‍රීවරු 30 දෙනෙක්‌ද තෝරා පත් කර ගැනේ.
මෙම නව ක්‍රමයට සියලු පක්‍ෂ එකඟ වුවහොත් දැනට ඇති මැතිවරණ කොට්‌ඨාශ 160 වෙනුවට නව මැතිවරණ කොට්‌ඨාස 140 ක්‌ නම් කෙරෙනු ඇත. ඒ සඳහා සීමා නිර්ණය කිරීම මැතිවරණ කොමසාරිස්‌ දෙපාර්තමේන්තුව සහ මිනුම්පතිවරයා විසින් සිදුකිරීමට නියමිතය.
අද පැවැත්වෙන සාකච්ඡාවෙන් පසු ඒ ඒ පක්ෂවල මන්ත්‍රී කණ්‌ඩායම් අතර මෙම යෝජනා සාකච්ඡාවට ලක්‌වන අතර ඉන් පසු අප්‍රේල් 6 වැනිදා දේශපාලන පක්‍ෂ නායකයන් විසින් නැවත හමුවී සාකච්ඡා කර අවසන් තීරණය ගනු ඇත.
එසේ එකඟතාව ඇතිවුව හොත් 20 වන ව්‍යවස්‌ථා සංශෝධනය ලෙස මෙය පාර්ලිමේන්තුවට ඉදිරිපත් කෙරේ. කෙසේ නමුත් 20 වන සංශෝධනය මැයි මාස 1 වන දිනට පෙර සම්මත කර ගෙන වෙසක් පොහොය දිනයෙන් පසුදින පාර්ලිමේන්තුව විසුරුවා හැර මහ මැතිවරණයකට යාමට ආණ්ඩුව බලාපොරොත්තුවේ.
