මේ නීතිමය ප්‍රතිපාදනයත් සමග දැනට ක්‍රීඩා සංගම්වල කටයුතු කරමින් සිටින බොහෝ දෙනකුට නැවත තනතුරු දැරීමේ අවස්ථාව අහිමිවේ. මෙයට එරෙහිව අධිකරණයේ පිහිට පතන බව ක්‍රීඩා සංගම් ප්‍රධානීහු කියති. නව නීතිය යටතේ අලුතෙන්ම පිරිසක් ක්‍රීඩා පරිපාලනයට එක්විය යුතු අතර එසේ වුවහොත් ක්‍රීඩා දියුණුවට ද එය බලපානු ඇති බව ක්‍රීඩා ප්‍රධානීන්ගේ මතය වී ති‍බේ.
වසර කිහිපයක්ම එක දිගට නිලතල එම නිලතල දරන අය ඉවත්ව අලුත් පිරිසකට ක්‍රීඩා පරිපාලනය භාරදිය යුතුව ඇතැයි කලක සිට මත පළවෙමින් තිබිණි. එහෙත් එය එකවර කිරීමෙන් අනිසි ප්‍රතිවිපාක අත්විය හැකි බවට ක්‍රීඩා ප්‍රධානීන් අනතුරු අඟවති. එහෙයින් ක්‍රීඩා හා සංචාරක ඇමැති නවීන් දිසානායක මහතාට මේ පිළිබඳව සංදේශයක් භාරදීමට ද එම ක්‍රීඩා සංගම් ප්‍රධානීන් ඊයේ කටයුතු ආරම්භ කොට තිබිණි.
ක්‍රීඩා රෙගුලාසි අනුව ක්‍රීඩා ඇමැතිවරයාගේ අනුමැතිය පරිදි ක්‍රීඩා දියුණුවට කැපවූ සංගම් ප්‍රධානීන්ට දෙවැනි වතාවට නාමයෝජනා ඉදිරිපත් කිරිමේ අවස්ථාව කලින් තිබුණ ද නීතිපතිවරයාගේ නව පැහැදිලි කිරීම් අනුව එම අවස්ථාව අහිමිවන්නේ ද යන්න ක්‍රීඩා ඇමැතිවරයාගෙන් අසා දැනගැනීම මේ සංදේශයත් සමග සිදුවන බව ඔවුහු පවසති. මේ අතර තවත් පිරිසක් මේ නව නීති ප්‍රතිපාදන ඉදිරිපත් කිරීම පිළිබඳ ක්‍රීඩා අමාත්‍යංශයට ප්‍රශංසා කිරීමට සැ‍රසේ.
ඉදිරියට පැමිණීමේ අවශ්‍යතාව තිබුණ ද කලක පටන් එක්තරා පිරිසක් ක්‍රීඩා සංගම්වල බලය අල්ලා සිටීමෙන් තම දක්ෂතා ප්‍රදර්ශනය කිරීමට නොහැකි වූ බව ඔවුහු පැවැසූහ. 'මේක විප්ලවීය තත්ත්වයක්. මතභේදාත්මක දෙයක් විය හැකියි. නමුත් කාලයට අනුව සිදුවිය යුතු දෙයක්.' නම හෙලි කිරීමට අකමැති වූ ක්‍රීඩා සංගම් ප්‍රධානියකු පැවැසීය. කෙසේ වුවද මේ තත්ත්වය හමුවේ නිලවරණ පැවැත්වීමේ කාලය දීර්ඝවනු ඇතැයි පැවැසේ.
dinamina
