අදාළ නඩුව අද(27) කැඳවමින් රහස් පොලීසිය විසින් සැකකාරිය අධිකරණය හමුවට ඉදිරිපත් කරන ලද අවස්ථාවේදී විත්තිය වෙනුවෙන් පෙනීසිටි නීතිඥයින් ඇය අසනීප තත්ත්වයකින් පසුවන බැවින් ඇප ලබාදෙන ලෙස ඉල්ලා ඇත.
එම අවස්ථාවේදී ඒ පිළිබඳ කොළඹ ප්‍රධාන මහේස්ත්‍රාත් ගිහාන් පිලපිටිය මහතා රහස් පොලීසියේ අදහස කුමක්දැයි විමසුවේය.
රහස් පොලීසිය වෙනුවෙන් පෙනීසිටි නියෝජිතයින් අධිකරණය විසින් සුදුසු තීරණයක් ගැනීම සම්බන්ධයෙන් තමාගේ විරෝධයක් නොමැති බව අධිකරණයට දැන්වීමෙන් පසු කරුණු සලකා බැලූ ප්‍රධාන මහේස්ත්‍රාත්වරයා ඇයට රු.15,000 ක මුදල් ඇපයක් හා රු.ලක්ෂ 5ක පුද්ගලික ඇපයක් මත නිදහස් කිරීමට තීරණය කළේය.හැම සිකුරාදාවකම අධිකරණයේ ලේඛකාධිකාරී හමුවේ පෙනී සිටින ලෙසද නියෝග කළේය.
ශෂී වීරවංශ කොළඹ වැලිකඩ බන්ධනාගාරයේ සිට බන්ධනාගාර රියකින් රැගෙන එනු ලැබුවාය. රහස් පොලිසිය පැවසූයේ පුද්ගලයන් ලියාපදිංචි කිරීමේ දෙපාර්තමේන්තුව ඇය ලබා ගත් හැදුනුම්පත් ගැන වාර්තාවක් ඉදිරිපත් කර ඇති බවයි.
1967 උපන් දිනයක් වෙනුවෙන් ජාතික හැදුනුම්පතක් ලබා ගත් බව හෙළි නොකර 1971 උපන් දිනයක් වෙනුවන් තවත් හැදුනුම්පතක් ලබාගෙන ඇතැයි එම වාර්තාවෙන් කියවෙයි.නීතීඥ ගුණරත්න වන්නිනායක මහතා මහේස්ත්‍රාත් පිලපිටිය මහතාට පැවසුවේ එම සිද්ධිය දරුණු අපරාධයක් නොවන හෙයින් ශෂී වීරවංශට ඇප දෙන ලෙසයි.
නඩුව ලබන 15 වැනි දා ට කල් තැබූ මහේස්ත්‍රාත් සාක්කිකරුවන්ට බලපෑම් නොකරණ ලෙස අවවාද කළේය.
