පසුගිය ජනාධිපතිවරණ සමයේදී පාසල් සිසුවෙකු යොදාගෙන ජනාධිපතිවරණ අපේක්ෂක මෛත‍්‍රීපාල සිරිසේන මහතාට අපහාස කිරීමේ ප‍්‍රවෘත්තියක් නිර්මාණය කිරීම සම්බන්ධයෙන් ඔහු අත්අඩංගුවට ගැනීමට පොලීසිය පරීක්ෂණ ආරම්භ කර තිබුණි.
සුදර්මන් රදළියගොඩ මහතා අද පෙරවරුවේ කොළඹ ප‍්‍රධාන මහාධිකරණයට භාර වී ඇත.ඒ අනුව කොළඹ අතිරේක මහේස්ත්‍රාත් ප්‍රියන්ත ලියනගේ මහතා විසින් ඔහුව ලබන 24 තෙක් රිමාන්ඩ් කරනු ලැබීය.
සිරිසේන මහතා සිය ඡන්ද ව්‍යාපාරයට බාල වයස්කාර දරුවකු යොදා ගත්තැයි රදළියගොඩ එම මාධ්‍ය මඟින් ප්‍රචාරය කළ බවත් එවැන්නක් සිදු නොවූ බවත් පොලිසිය අධිකරණයට දැන්වීය.
රදළියගොඩට අමතරව හිටපු ජනාධිපති මහින්ද රාජපක්ෂ මහතාගේ නීති උපදේශකවරයෙකු ලෙස කටයුතු කළ නීතීඥ සේපාල රත්නායක මහතා අත්අඩංගුවට ගැනීම සඳහා පරීක්ෂණ පවත්වන බවද පොලීසිය සඳහන් කළේය.
ඔහු මේ වන විට රටින් පිටව ගොස් ඇති බවට පොලීසියට තොරතුරු ලැබී ඇත.
මෙම ව්‍යාජ ප‍්‍රවෘත්තිය නිර්මාණය කිරීමට පහසුකම් ලබා දුන් බවට සැකපිට ජනාධිපති ආරක්ෂක අංශයේ සහකාර පොලිස් අධිකාරීවරයෙකු ඇතුළු එහි සේවය කරන පොලිස් නිළධාරීන් පස් දෙනෙකු අත්අඩංගුවට ගෙන තිබුණි. ඔවුන්ගෙන් සිව් දෙනෙකු රක්ෂිත බන්ධනාගාර ගත කර ඇති අතර සහකාර පොලිස් අධිකාරීවරයා හට අධිකරණයෙන් ඇප නියම වී තිබේ.
මෙහිදී සැකකරු වෙනුවෙන් පෙනී සිටි නීතීඥ සංජය ගමගේ මහතා ප්‍රකාශ කළේ, ඔහුට ඉහළින් සිටින නිලධාරියෙකු වන අනුර සිරිවර්ධන මහතා කළ නියමයක් අනුව සැකකරු මෙය සිදු කර ඇති බව ය.
ඒ අනුව, අනුර සිරිවර්ධන මහතාගෙන් ද ප්‍රකාශයක් සටහන් කර ගන්නා ලෙස මහේස්ත්‍රාත්වරයා නියම කළේ ය.
සබැදි පුවත්
සුදර්මන්ටත් රට යන්න තහනම්
