කොටුව ලංකා බැංකුවේ තැප්‍රෝබේන් ශාඛාවේ ඇති අංක 7040000 'අපි වෙනුවෙන් අපි' ගිණුමෙන් පසුගිය දෙසැම්බර් 11 වෙනි දින විදේශීය ගනුදෙනු හතරක් සඳහා රුපියල් 50,589,993ක් වූ එක් ගෙවීමක් ලෙස රුපියල් මිලියන 141.65ක් ගෙවා තිබීම සැකකටයුතු වීම හේතු කොට ගෙන මෙම විමර්ශන ආරම්භ කර තිබේ.

එසේම පසුගිය දෙසැම්බර් 31වන දින රුපියල් මිලියන 22ක පමණ මුදලක් 100160 දරන චෙක්පත් මගින් ගෙවා ඇති අතර එම බැංකුවේම ඉතිරි කිරීමේ ගිණුමක් ලෙස පවත්වා ගෙන ආ 73249610 දරන ගිණුමේ රුපියල් මිලියන 14ක් අඩු වී ඇත.

අපි වෙනුවෙන් අපි ගිණුමේ මුදල් ආපසු ගැනීමේ අත්සන් බලය ගෝඨාභය රාජපක්ෂ, බී යූ රත්නවීර, පී ද සිල්වා, බී ඩී ඩබ් ඒ සිල්වා සහ ඩී ආර් කිරන්තුඩුව යන අයට හිමිවී ඇතැයිද එම පරීක්ෂණයෙන් සනාථ වී තිබේ. හිටපු ජනාධිපති මහින්ද රාජපක්ෂගේ ආණ්ඩුව සමයේ අපි වෙනුවෙන් අපි ලෙසට වෙනස් කර ඇත්තේ පැරණි' රාජ්‍ය ආරක්ෂක අරමුදල' බවට හමුදා අභ්‍යන්තර ආරංචි මාර්ග සඳහන් කරන අතර මෙම ගිණුමට මහජනතාව විසින් රුපියල් කෝටි ගණනාවක්ම විවිධ හේතුන් මත ශ්‍රී ලංකා ආරක්ෂක හමුදා සෙබළුන්ගේ සුබසාධනය වෙනුවෙන් පරිත්‍යාග කර තිබේ.