දිවයින පුරා ක්‍රියාත්මක වන පරිසර සංවිධාන 20 කට අධික සංඛ්‍යාවකින් සැදුම් ලත් ජාතික පරිසර සංවිධාන එකමුතුව විසින් සකස්කරන ලද ජාතික පරිසර ප්‍රතිපත්තිය ජනාධිපතිවරණයට පෙර පිළිගත් බැවින් එම පරිසර ප්‍රතිපත්තියේ සඳහන් කරුණු වහාම ඉටු කිරීම ජනාධිපතිවරයාගේ වගකීමක් වන බැවින් පරිසර සංවිධාන මේ ඉල්ලීම කර සිටී.
මේ සම්බන්ධයෙන් කැඳවූ මාධ්‍ය හමුවක් පසුගියදා (21දා) ජාතික පුස්තකාලයේදී පැවැති අතර ඊට එක්වූ පරිසර සංවිධානවල නියෝජිතයන් අවධාරණය කළේ වනජීවී හා වන සංරක්‍ෂණ දෙපාර්තමේන්තුව සංචාරක අමාත්‍යාංශය යටතට පවරා දී ඇති බවයි. රජය මීට පෙර පරිසරය සහ වනාන්තර විවිධ අමාත්‍යාංශවලට බෙදාදීම හේතුවෙන් මේ රටේ අලි - මිනිස් ගැටුම සහ ප්‍රබල ලෙස සිදු කළ පරිසර විරෝධී ව්‍යාපෘති සඳහා ඉඩකඩ ලබාගත් බව පෙන්වා දෙන මොවුන් වනජීවීන්ගේ වගකීම පවතින්නේ වන සංරක්‍ෂණ දෙපාර්තමේන්තුවට විනා වන සන්දර්ශන පැවැත්වීමට කටයුතු කරන සංචාරක අමාත්‍යාංශයට නොවන බැවින් වහාම එම වැරැද්ද නිවැරැදි කළ යුතු බව අවධාරණය කරයි.
මේ වන විට පරිසර හා වනජීවී විෂයට අදාළව අමාත්‍යාංශවලට නව ඇමැතිවරුන් ලේකම්වරුන් පත් කර තිබියදී තවදුරටත් පැවැති ආණ්ඩු සමඟ එක්වූ වනජීවීන් නීති විරෝධී ලෙස එක් එක් පුද්ගලයන්ට ලබාදීමේ කූට ව්‍යාපාරයේ යෙදුණු ලේකම්වරුන්, අධ්‍යක්‍ෂවරුන් තවදුරටත් එම ආයතනයන්හි රැඳී සිටින බවත් ඔවුන්ට එරෙහිව නීතිමය පියවර ගන්නා ලෙසත් ජනාධිපතිවරයාගෙන් පරිසර සංවිධාන ඉල්ලා සිටී.
පැවැති ආණ්ඩුව විසින් සමුද්‍රීය වෙරළ ආරක්‍ෂක අධිකාරිය ආරක්‍ෂක අමාත්‍යාංශය වෙත පවරා දී තිබූ අතර එය වහාම ඉවත් කළ යුතු බවට පරිසරවේදීන් කළ ඉල්ලීමට එකඟව නව ආණ්ඩුව විසින් එම අමාත්‍යාංශයෙන් එය ඉවතට ගෙන පරිසර අමාත්‍යාංශය වෙත පවරාදීම පිළිබඳ සතුට පළ කරන බවද අදාළ නියෝජිතයන් පැවැසීය. මේ මාධ්‍ය හමුවේදී ඔවුන් වැඩිදුරටත් අවධාරණය කෙළේ, පසුගිය කාලයේදී සිදුවූ දැවැන්ත පරිසර විනාශයට මේ රටේ විද්‍යාඥයන්, විශේෂඥයන් යැයි කියා ගනිමින් සිටින පුද්ගලයන්ද ඍජුව වගකිව යුතු බවත් ඒ පිළිබඳ විස්තර තමන් සතුව තිබෙන බවත්ය.
(mawbima)
