කොළඹ සමාජ හා සාමයික කේන්ද්‍රයේදී පවත්වන ලද පෙරටුගාමී සමාජවාදී පක්ෂයේ මාධ්‍ය හමුවකදී එම පක්ෂයේ දේශපාලන මණ්ඩල සභික පුබුදු ජයගොඩ මේ බව පැවසූ අතර එහිදී ඔහු වැඩිදුරටත් සිය පක්ෂයේ අදහස් පලකල අයුරු.
‘‘මේ ආණ්ඩුව තමන්ගේ දැක්ම ලියවිලි දෙකකින් ඉදිරිපත් කරලා තිබෙනවා. එකක ප්රතිපත්ති ප‍්‍රකාශනය. ඒ ගැන අපි මැතිවරණයට පෙරත් කතා කළා. ඒ ප්රතිපත්ති ගැන අපිට බරපතළ විවේඡනයක් තිබෙනවා. කැමති ගාණක් දාගන්න ඉඩ තියලා හිස් චෙක් එකක් අත්සන් කරලා පාලකයන්ට දෙන්න එපා කියලා අපි ජනතාවට කිව්වා. කොහොම වුණත් ලක්ෂ 60කට අධික ජනතාවක් මෛත‍්‍රීපාල සිරිසේන මහතා ගැන විශ්වාසය තබා තිබෙනවා. ඒ වගේම අපි මැතිවරණයෙන් පසු ජනතාවට විවේක ගන්න බෑ ඇත්ත දේශපාලන අරගලය පටන්ගන්න වෙන්නේ නවවෙනිදායින් පසු කියා කීවා. දැන් ආණ්ඩුව දින 100ක වැඩපිළිවෙළක් ඉදිරිපත් කරලා තිබෙනවා. ඒක තමයි දෙවැනි ලියවිල්ල. ඉලක්ක සම්පූර්ණ කරන දින වකවානු සහිතව වැඩපිළිවෙළක් ඉදිරිපත් කිරීම අපි සාධනීය ලෙස දකිනවා.
නමුත් ඒවා ඉටුකරගන්න නම් ජනතාවට සටන් කරන්න සිදුවෙනවා. ඒ වගේම බලය තහවුරු කරගන්න ක‍්‍රියාමාර්ග වලට හදිසි වුණාට මේ වැඩපිළිවෙළේ අනෙක් දේවල් ඉක්මනින් ඉටුකරගන්න නම් ජනතාවගේ පැත්තෙන් තෙරපුමක් අවශ්‍යයි. උදාහරණයක් විදියට දින 100 වැඩපිළිවෙළට අනුව ජනාධිපතිවරයා දිවුරුම්දෙන්න නියමිතව තිබුණේ ජනවාරි 10 දා. අගමැති දිවුරුම් දෙන්න නියමිතව තිබුණේ 11 දා. නමුත් ඒ දෙකම සැලසුම් කළාටත් කලින් 09 හවසම කළා. ඒකට කමක් නෑ. නමුත් ඉතිරි ඒවාටත් ඒ හදිස්සිය තිබෙනවාද? 12 දා ව්‍යවස්ථා සංශෝධනයට අදාළව උපදේශක සභාව පත්කරන බව කීවත් තවමත් එය සිදුකර නෑ. 20දා පාර්ලිමේන්තු අධීක්ෂණ කාරක සභා පක්කරන බව කියනවා ඒකත් ප‍්‍රමාද වන ලකුණු තියෙනවා.
මේවා ඉක්මනින් ඉටුකරගන්න වගේම අංග සම්පූර්ණ කරගන්නත් අරගලයක් තිබෙනවා. ව්‍යවස්ථා සංශෝධනය ගත්තත් එය මේ ව්‍යවස්ථාවම පැලැස්තර අලවනවා වෙනුවට ප‍්‍රජාතන්ත‍්‍රවාදය සුරකින නව ව්‍යවස්ථාවක් සඳහා ජනතාව අරගල කළ යුතුයි. ව්‍යවස්ථාව සකස් කරන මණ්ඩලයට සැබෑ ජනතා නියෝජනයක් ගන්න ජනතාව අරගල කළ යුතුයි. අනෙක් අතට කවර හෝ ව්‍යවස්ථාවක් සකස් කළ යුත්තේ හා සම්මත කළ යුත්තේ ජනතාවගේ කැමැත්තෙන්. ඒ සඳහා ජනමත විචාරණයක් නොපවත්වා, පාර්ලිමේතුව තුළම සම්මත් කරන බවයි දින 100යේ වැඩපිළිවෙළේ තිබෙන්නේ. ජනතාව මැදිහත් නොවුණොත් පාර්ලිමේන්තුවේ කමිටුවකින් ව්‍යවස්ථා සංශෝධන හදලා පාර්ලිමේන්තුව තුළම ඒක සම්මත කරගනීවි.”
