මෙහිදී සමස්ත ලංකා උපකාරක ගුරු සංගමයේ සභාපති ලෙස කටයුතු කරන ආර්ථික විද්‍යා දේශක ප‍්‍රභාත් කොඩිතුවක්කු මහතා අදහස් දැක්විය.
‘‘වෘත්තීය දේශක වරුන් ලෙස කිසිම දිනක අපේ අයිතීන් වෙනුවෙන් සමාජය ඉදිරියේ පෙනී සිට නැහැ. රටේ අනාගතය භාරගන්නට සිටින දරුවන්ගේ අනාගතය වෙනුවෙන් යහපත් මග පෙන්වීමක් කිරීම අපට පැවරී ඇති ජාතික වගකීමක්.
අද අධ්‍යාපනය පහතට වැටී ඇත. ප‍්‍රතිඵල ඉහළ මට්ටමක තිබෙනවා යයි වර්තමාන රජය විසින් ප‍්‍රකාශ කලත්, ඔවුන් එය ළඟා කර ගෙන ඇත්තේ සමත් වීමේ ලකුණු මට්ටම පහත දැමීමෙන් හෝ ප‍්‍රශ්න පත‍්‍ර වල ගුණාත්මක බව අඩු කිරීම මගින්. රට තුළ නිදහස් අධ්‍යාපනය තිබුනත් අද වන විට දරුවන් ගේ නිදහස් අධ්‍යාපනය තහවුරු කරන්නේ වෘත්තීය දේශක වරුන් විසින්. මෙම තත්වය නිසා අධ්‍යාපනයේ බරපතල විෂමතා ඇතිව තිබේ. සම්පත් තිබෙන පාසල් වලට පමණක් වැඩි අවධානය යොමු කරමින් සිටී. සංවර්ධනය ගැන රාජපක්ෂ මහතා නිතරම කතා කරයි. ඔහු සංවර්ධනය ලෙස හඳුන් වන්නේ නගරයකින් නගරයකට යාම පමණයි.’’
මෙම අවස්ථාවට සම්බන්ධ වූ සමස්ත ලංකා උපකාරක ගුරු සංගමයේ උප සභාපති ආර්ථික විද්‍යා දේශක ප‍්‍රදීප් උඩුවන මහතා ප‍්‍රකාශ කළේ :
මෙවැනි වේදිකාවකට පැමිණ වෙනත් ජනාධිපතිවරයෙකු පත්කරන්නට දායකත්වය ලබා දෙන්නේ වර්තමාන පාලනය විසින් දුවා දරුවන් ගේ අනාගතය විනාශ කරමින් පවතින නිසා. අද පොදුරාජ්‍ය මණ්ඩල සමුළුවේ මුල් පුටුවෙ තබන්නේ කැසිනො රජෙක්. නව විෂය නිර්දෙශය ගුරු අත් පොතෙන් බොහෝ දේ ඉවත් කර ඇත. දැනුමෙන් අඩු දරුවන් බිහි කරන යුගයක් නිර්මාණය කර ඇත.
මෙහිදී සමස්ත එක්සත් වෘත්තීය සේවක සංගමයේ අනුශාසක ආර්ථික විද්‍යා දේශක තිලක් මහනාම මහතා ප‍්‍රකාශ කළේ :
‘‘දෙවරක් විධායක බලයෙන් ජනාධිපති ධුරයට පත් මහින්ද රාජපක්ෂ මහතා ජීවිත කාලය තුලම මෙම බලය පවත්වා ගැනීමට 18 වන ආණ්ඩුක‍්‍රම ව්‍යවස්ථාව සංශෝධනයට ලක් කළා, එය රටට කළ දෙයක් නෙමෙයි ඔවුන්ගෙ පවුල් පාලනයේ යහපත සඳහා සිදු කර ගත් දෙයක්.මෙය අද වන විට ජනතාව හොඳින් තේරුම් ගෙන තිබෙනවා. තරුණයින් මෙන්ම ඔවුන්ගෙ දෙමව්පියන් පවා මෛත්රී පාලනයට සහයෝගය ලබා දෙමින් සිටී’’
ප‍්‍රවීණ සිංහල දේශක බෝසිත් පතිරණ මෙහිදී අදහස් දැක්වීය ‘‘අනාගත පරම්පරාව සඳහා නිවැරදි මග පෙන්වීමක් කිරීම යුතුකම 2005 දී අපි එවකට අග මැතිව සිටි මහින්ද රාජපක්ෂ මහතා ජනාධිපති බවට පත් විය යුතු යැයි පුවත් පත් දැන්වීම් වලට අත්සන් පවා ලබා දුන්නා, එය නිවැරදි තීරණයක් බවට පත් වුණා. නමුත් අද මතට තිත නමින් වැඩ පිළිවෙලක් ගෙනාවට අද මතින් තොර සමාජයක් නැහැ. කැසිනෝ, කුඩු, ගණිකා මඩම් ව්‍යාප්ත වෙලා දරුවන් ගොදුරු කරගන්නා සමාජයක් නිර්මාණය කරලා භෞතික සම්පත් ගොඩ නැගුවට දරුවන්ගෙ ආධ්‍යාත්මය ගොඩනගන විෂය නිර්දේශය නවීකරණය වෙලා නැහැ.2015 ජනවාරි ලබා දීමට නියමිත 10 ශේණියට නිර්දේශ කර ඇති සිංහල පොත් වල සිංහල හෝඩිය වත් නිවැරදි නැහැ. අධ්‍යාපන අමාත්‍යාංශය දරුවන් කොතනටද ගෙනයමින් සිටින්නෙ..?”
{soundcloud}https://soundcloud.com/lankadaily/sprit-1{/soundcloud}
