පීපල් ෆෝ ද එතිකල් ට්‍රීට්මන් ඔෆ් ඇනිමල්ස් (people for the ethical treatment of animals) සංවිධානය විසින් 'මාලි' නමැති ඇතින්න නිදහස් කර ගැනීම සඳහා අන්තර්ජාලයේ පෙත්සමක්ද මේ වනවිට ආරම්භ කර ඇත.
1977 දී අවුරුදු 3දී සත්ත්ව හුවමාරු ක්‍රමය යටතේ කුඩා ඇතින්න පිලිපීනයට ලබාදී ඇති අතර 'මාලි' නම් මෙම ඇතින්න පසුගිය වසර 35ක කාලයක් ගත කර ඇත්තේ කුඩා කොන්ක්‍රීට් කූඩුවකය. අවිහිංසාවාදී සත්ත්ව සංවිධානවල ඉල්ලීම වනුයේ 'මාලි' තායිලන්තයේ අලි ඇතුන් සඳහාම වෙන් වූ වනාන්තරයට නිදහස් කරන ලෙසය.
මේ වනවිට 'මාලි' ඉතාම දුඛිත තත්ත්වයකට පත්ව ඇති බව පෙන්වා දෙන එම සංවිධානය අලියකුට අවශ්‍ය අවම පහසුකම් හෝ මෙම වසර 35 තුළදී 'මාලි'ට නොලැබී තිබීම ඉතා අවාසනාවන්ත තත්ත්වයක් බවයි.
මේ සම්බන්ධයෙන් සත්ත්ව උද්‍යාන හා විනෝදාත්මක කටයුතු අමාත්‍යංශ ලේකම් විලී ගමගේ මහතාගෙන් කළ විමසීමකදී ඒ මහතා මෙසේ ප්‍රකාශ කෙළේය.
'මට ඔය ගැන තාම වාර්තා වෙලා නැහැ. කොහොම වුණත් ඉක්මනට මම හොයලා බලනවා. මේ සම්බන්ධයෙන් තානාපති කාර්යාලයට කියලා වාර්තාවක් ගෙන්වාගෙන එරට රජය හා බලධාරීන් සමඟ සාකච්ඡා කරලා ඒ සතාට සාධාරණයක් කරන්න ඉක්මනින් කටයුතු කරනවා.
සාමාන්‍යයෙන් සතෙක් තෑග්ගක් විදියට හරි සත්ත්ව හුවමාරුව යටතේ හරි දුන්නාම අවුරුද්දක් පාසා ඒ සතා ගැන හොයලා බලන්න ඕනේ.නමුත් ඒක ප්‍රායෝගිකව හරිම අමාරු දෙයක්. අපි සතෙක් දෙන්නේ ඒ විශ්වාසය මත. කොහොම වුණත් මේ ඇතින්න මෙහෙම දුකක් විඳිනවා නම් හුදෙකලාව ජීවත් වෙනවා නම් ඒ ගැන තීරණයක් ගන්න වෙනවා. ඒ ගැන ඉක්මන් ක්‍රියාමාර්ගයක් ගන්න මම කටයුතු කරනවා.'
(මූලාශ්‍රය- මව්බිම)
