සිය පුතු මාලක සිල්වාට පහරදීම පිළිබඳ අදහස් ප්‍රකාශ කළ අමාත්‍ය මර්වින් සිල්වා මහතා
“සෙනසුරු මාරුවට දවසකට ඉස්සෙල්ලා අපිට කරදරක් වෙයි කියලා හිතන් හිටියේ. දැන් මං පුතා එක්ක යනවා සිංගප්පූරුවට. මට සතුටු නෑ. ඊර්ෂියාකාරයින්ට සැනසීමක්. මට ආදරය කරන උදවියට මේක දුකක්. එහෙම වෙන්න එපැයැ. නැත්නම් ජීවිතේ එකවිදියටම යන් නෑනේ. මේක අභියෝගයක්. අභියෝගයට මුහුණ දෙනවා. පුතාට හුඟක් තුවාලයි. දැන් කල්පනා කළා සිංගප්පූරුවට එක්ක යන්න.“
“ කෑවා බීවම මිනිස්සු ගහ ගන්නවා. එච්චරයි ඒක ලොකු දෙයක් නොවෙයි. ජීවිත කාලෙම මේවට මුහුණ දෙන්න ඕන. මගේ පුතා ආබාධිතයෙක් නෙමෙයිනේ. ඇමතිවරයාගේ පුතාට වුණාම තමා ලෙඩේ. වෙන කාගේහරි පුතාට වුණානම් දන්නෙත් නෑනේ. මගේ පැත්තෙන් තියෙන්නේ පුතා හොඳ කරගන්න සිංගප්පූරුවට යන්න. එහෙම නැත්නම් වැඩේ බැරිනම් මල් ශාලාවට යන එකයි. මං ඒ දෙකට ලෑස්තියි.“ යැයි අමාත්‍යවරයා පැවසීය.
මේ අතර මාලක සිල්වාට සිදු වූ පහරදීම සම්බන්ධයෙන් චෝදනාවට ලක්ව සිටින්නේ විදේශිකයෙකු බව පොලිසිය පවසයි. එම විදේශිකයා ස්කොට්ලන්තයෙන් පැමිණි අයෙකු ලෙස හඳුනාගෙන ඇති බව පොලිස් ප‍්‍රකාශක ජ්‍යෙෂ්ඨ පොලිස් අධිකාරී අජිත් රෝහණ මහතා පැවසුවේය.
ඉදිරි විමර්ශන සඳහා අදාළ පහරදීම සිදුවූ රාත‍්‍රී සමාජ ශාලාවේ සී.සී.ටීවී දර්ශන ද අධ්‍යයනය කරන බව ඔහු කියා සිටියේය.
