සරත් ෆොන්සේකා මහතාගේ නම ඡන්ද හිමි නාමලේඛනයෙන් ඉවත් කර ඇති බවට මැතිවරණ කොමසාරිස්‌වරයා විසින් දැනුම් දීම සම්බන්ධයෙන් සිය ස්‌ථාවරය පැහැදිලි කිරීම සඳහා ඊයේ (17 දා) එම පක්‍ෂ මූලස්‌ථානයේ පැවැති මාධ්‍ය හමුවකදී ෆොන්සේකා මහතා මෙසේ ද කීවේය.

මේ රටේ පාලකයා ජනාධිපතිවරණයකට යැමේ පෙරහුරුවක්‌ ලෙස තමයි මගේ ඡන්ද අයිතිය අහිමි කර ජනාධිපතිවරණයට මා ඉදිරිපත්වීම වැළැක්‌වූයේ. මා අභියෝග කරනවා ජනාධිපතිවරයාට පුළුවන් නම් ස්‌වාධීන ඡන්දයක්‌ පවත්වලා මා සමඟ තරගයට පැමිණ දිනලා පෙන්වන්න කියා.

2013 ඡන්ද ලැයිස්‌තුවේ මගේ නම තිබුණා. 2014 ඡන්ද ලැයිස්‌තුවෙත් මගේ නම ඇතුළත් කර තිබුණා. 2013 ඡන්ද ලැයිස්‌තුවේ මගේ නම ඇතුළත් බව මට දැනුම් දුන්නෙත් මැතිවරණ කොමසාරිස්‌වරයාමයි. ඔහු මට ව්‍යවස්‌ථාව පෙන්වලා මට කිව්වා යමෙක්‌ සිරගත කර වසර දෙකක්‌ සම්පූර්ණ සිර දඬුවම විඳීමෙන් පමණයි ඡන්ද අයිතිය අහිමි වෙන්නේ කියා. මට මහාධිකරණය මගින් මාස තිහක සිර දඬුවමක්‌ නියම කළත් මාස 20 කදී මේ රටේ පාලකයා මාව එළියට දැම්මා. ඒ අනුව මගේ ඡන්ද අයිතිය අහිමි වන්නේ නැහැ.

එහෙත් නීතිපති දෙපාර්තමේන්තුවේ උපදෙස්‌ මත මගේ ඡන්ද අයිතිය අහිමි කළ බව පෙරේදා (16 දා) මැතිවරණ කොමසාරිස්‌වරයා මාගේ ලේකම්වරයාට දැනුම් දී තිබෙනවා. 


තමාගේ බලය පාවිච්චි කරන්න දන්නේ නැති, ගන්න වැටුපට සේවයක්‌ නොකරන, පඹයෙක්‌ වගේ හැසිරෙන මැතිවරණ කොමසාරිස්‌වරයා අම්බලන්ගොඩ කෙනෙක්‌ කියන්නවත් මම කැමැති නැහැ.

කෙසේ වෙතත් පාලකයන්ගේ මේ මර්දනය හමුවේ අපි පසුබසින්නේ නැහැ. මට වඩා ඡන්ද ගන්න පුළුවන් චරිත අපේ පක්‍ෂයේ තව ඉන්නවා. අපිට අවශ්‍ය වුණොත් ජනාධිපතිවරණයට අපේ පක්‍ෂයෙන් එවැනි අපේක්‍ෂකයෙක්‌ ඉදිරිපත් කරනවා. කෙසේ නමුත් තවම අපි තීරණය කර නැහැ ජනාධිපතිවරණයේදී කුමන තීරණයක්‌ද ගන්නේ කියලා. මේ පාලකයා එලවන්න අපි සෑම ක්‍රියාමාර්ගයක්‌ම ගන්නවා. ඒ සඳහා ඕනෑම කැපකිරීමක්‌ කරනවා.