පසුගිය යුධ සමයේ මෙම මාර්ගය විනාශ කිරීමෙන් පසු 1990 ජුලි මස 04 වැනිදා සිට යාපනය දක්‌වා දුම්රිය ධාවනය ඇනහිට තිබිණි. එය නැවත වසර 24 කට පසු අද සිට යථා පරිදි දුම්රිය කටයුතු සිදුකෙරේ.
කොළඹ යාපනය අතර දුම්රිය හතරක්‌ ධාවනය කෙරෙන අතර ඉන් දෙකක්‌ නගරාන්තර දුම්රිය සේවා වේ. එක්‌ දුම්රියක්‌ සුඛෝපභෝගී දුම්රියක්‌ ද වේ.
කොළඹ සිට යාපනය දක්‌වා සාමාන්‍ය දුම්රිය සේවා ගාස්‌තුව රුපියල් 320 කි. වෙන් කරන ලද පළමු පන්තිය සඳහා රුපියල් 900 ක්‌ද, වෙන්කරන ලද දෙවන පන්තිය සඳහා රුපියල් 800 ක්‌ද, තුන්වැනි පන්තිය සඳහා රුපියල් 350 ක ගාස්‌තුවක්‌ ද අයකෙරේ.
වායුසමීකරණය කරන ලද දුම්රියේ ගමන් කිරීම සඳහා එක්‌ මගියකුගෙන් රුපියල් 1500 ක මුදලක්‌ අයකෙරේ. යාල්දේවි ගල්කිස්‌ස දුම්රිය ස්‌ථානයෙන් ගමන් ආරම්භ කරයි.
මෙම උතුරු දුම්රිය මාර්ගය සඳහා ඉන්දීය රජය මුල්‍ය දායකත්වය ලබාදී ඇත.
