එවැනි එජාප -ශ්‍රීලනිප හවුල් ආණ්ඩුවක් යටතේ ද යම් පමණකින් හෝ වංචා දුෂණ සිදුවිය හැකියයි සැකපල කරන සමරවීර මහතා, එම තත්වය අවම කිරීම සඳහා පාර්ලිමේන්තු 'කෝප්' කමිටුවේ බලය ජවිපෙට ලබාදිය යුතු බවට ද යෝජනා කර සිටියි.

ඉරිදා 'දේශය' ජාතික පුවත්පත සමග පැවති සම්මුඛ සාකච්ජාවකදී සමරවීර මහතා ඒ බව සඳහන් කර ඇත.

21වැනි සියවසට ගැලපෙන නායකයා :

ජනතා විමුක්ති පෙරමුණේ වත්මන් නායක අනුර කුමාර දිසානායක මහතා විසි එක්වැනි සියවසට ගැලපෙන අවශ්‍යතාවයන් හදුනාගත්, නවීන පන්නයේ වාමාංශික නායකයෙක් බව ද සමරවීර මහතා පවසයි.

ජනාධිපතිවරණයේදී විපක්ෂයේ පොදු සන්ධානයකට එක්වීමට ජවිපෙට ආරාධනා කරන්නේ ඇයි දැයි සමරවීර මහතා මෙසේ පැහැදිලි කර ඇත.

'' අපි ජවිපෙට ආරාධනා කරන්නේ ආණ්ඩු හදන්නවත්, එජාප ප්‍රතිපත්ති අනුමත කරවා, අපිට කඩේ යන්නවත් නෙමේ. අපි කියන්නේ මේ සියල්ලම කලින් රටේ තියෙන ඒකාධිපතීත්වය පැරදිය යුතුයි. පාට පක්ෂ අමතක කරල අපිට කටයුතු කරන්න වෙනවා. මමත් හිතන්නේ එජාපටයි ජවිපෙටයි එකතුවෙලා රටක් පාලනය කිරීම සුදුසු නැහැ.

නමුත් අනිත් පැත්තෙන් රටක් පාලනය කිරීමේදී ජවිපෙට විශාල කාර්යභාරයක් තියෙනවා. එයාලගෙ විනය, දූෂණයට එරෙහිව නගන හඩ වැදගත්. මොකද අපේ ආණ්ඩුවක් තිබුණත් දූෂණය සම්පූර්ණයෙන් නවතින එකක් නැහැ. අපෙත් අඩුපාඩු තියේවි. එවේලෙදි විවේචනාත්මක ශක්තිමත් විපක්ෂයක් තිබිය යුතුයි අන්න ඒ විදිහටයි මම ජවිපෙ දෙස බලන්නෙ. මම කියන්නේ අපි කෝප් සභාවත් ජවිපෙට ලබාදිය යුතුයි.''

ජවිපෙ කාර්යය භාරය විශාලයි :

අද විවේචනාත්මක ශක්තිමත් විපක්ෂයේ කාර්යභාරය ඉටු කරන්නේ ජවිපෙ කියන එකද? කියා මාධ්‍යවේදියා නැඟූ ප්‍රශ්නයට පිළිතුරු දෙමින් සමරවීර මහතා මෙසේ පවසා ඇත.

''නැහැ නැහැ අපි ඒ කාර්යය ඉටු කරන නිසා තමයි අද 40%ක් ජනතාව අපි ගැන විශ්වාසය තබල තියෙන්නෙ. නමුත් ජවිපෙ අපි කියන දේම වේගවත්ව නිර්මාණශීලීව කියනවා. අපි දෙගොල්ලන්ම එකම කතාව කිව්වට කවුරුවත් එයාලගෙ කතාව අහන්න කැමැතියි. ආණ්ඩු නොකළත් ජවිපෙට රට වෙනුවෙන් කළ හැකි කාර්යය භාරය විශාලයි.

මේ ඒකාධිපතීත්වය පැරදවීමට පවුල් පාලනය පැරදවීමට කොන්දේසි විරහිතව ජවිපෙ අපිත් සමග එක්විය යුතුයි.

ඉදිරියේදී ප්‍රධාන විපක්ෂයේ කාර්යභාරයත් ජවිපෙට පැවරෙන්න පුළුවන්. මොකද මීළගට එන රනිල් වික්‍රමසිංහ ජනාධිපතිතුමාගේ ආණ්ඩුව මම දකින්නේ එජාප ශ්‍රීලනිප හවුල් ආණ්ඩුවක් විදිහටයි. මොකද ජවිපෙ අප අතර තියෙන පරස්පරය අපියි නිදහස් පක්ෂයයි අතර නැහැ. ඉතින් නිදහස් පක්ෂයේ පිරිසක් එකතු කරගෙන ආණ්ඩුව හැදුවාම ජවිපෙ විපක්ෂයේ කාර්යභාරය කිරීම රටට හොද යහපත් තත්ත්වයක් වේවි. ''