සබරගමුව විශ්වවිද්‍යාලයේ සිසුන් ඉල්ලීම් ගණනාවක් මුල් කරගනිමින් මේ වනවටද සත්‍යග්‍රහයක නිරතව සිටින අතර ඊට අදාළව කිසිඳු විසඳුමක් ලබාදීමට උසස් අධ්‍යාපන අමාත්‍යංශය අසමත්ව සිටියදී හදිසියේ අද මෙලෙස කාන්තා නේවාසිකාගාරයක් විවෘත කිරීමට කටයුතු යොදා ඇත.
කෙසේ නමුත් මෙම ගොඩනැගිල්ල ඉදිකිරීමේදී ප්‍රමිතියෙන් තොරව ඉදිකර ඇති බවත් මෙහි ඉදිකිරීම් අවසන්ව නොමැති බවත් ශිෂ්‍ය ක්‍රියාකාරීහු පවසති.
මේ දිනවල පවතින වර්ෂාවත් සමග නායයාමේ අවධානමක්ද මෙම ප්‍රදේශයේ පවතින බැවින් සිසුවින් 400ක් පමණ මෙයට ඇතුළු කළවිට තත්වය බරපතල වන බවත් එම සිසුවින්ගේ ජීවිත අනතුරේ දැමීමක් බවත් ඔවූහු පවසති.
මෙම තත්වය තුළ අද පෙරවරුවේ උසස් අධ්‍යාපන අමාත්‍ය එස්.බි.දිසානායක මහතා අදාළ ගොඩනැගිල්ල විවෘත කිරීමට පැමිණි අවස්ථාවේ පඹහින්න ප්‍රදේශයේ මාර්ගය හරස් කරමින් සිසුන් මෙම විරෝධතාවයේ නිරත වී ඇත.
එම අවස්ථාවේ ඇමතිවරයා විරෝධතාවයේ නිරත සිසු සිසුවියන් සමග යම් වචන හුවමාරුවක නිතර වූ අතර එහිදී උණුසුම් වාතාවරණයක් ඇති වී තිබේ.
එම අවස්ථාවේ ජල ප්‍රහාරක රථ භාවිතා කරමින් සිසුන් විසුරුවා හැර අමාත්‍යවරයා විශ්වවිද්‍යාලය තුළට ගොස් ඇති අතර ශීෂ්‍ය ශීෂ්‍යාවෝ උසස් අධ්‍යාපන අමාත්‍යවරයාගේ උත්සවය වර්ජනය කරමින් කාන්තා නේවාසිකාගාරයේ ආරක්ෂාව තහවුරු කරන ලෙස බළ කරමින් විරෝධතාවයේ යෙදී සිටිති.
