ආණ්‌ඩුක්‍රම ව්‍යවස්‌ථාවට අනුව මහින්ද රාජපක්‍ෂ මහතාට තුන්වැනි වරට ජනාධිපතිවරණයට ඉදිරිපත් විය නොහැකි බව කී එම ප්‍රකාශකයා රාජපක්‍ෂ මහතා ජනාධිපතිවරණයට තරග කළොත් එය නීතිවිරෝධී ජනාධිපතිවරණයක්‌ වනු ඇතැයි ද කීය.
එසේ වුවොත් ජනාධිපතිවරණයට තරග නොකර එහි නීත්‍යනුකූල නොවන තත්ත්වය පිළිබඳ ජනතාව දැනුවත් කරමින් ජනාධිපතිවරණයට එරෙහිව ජනතාව පෙළගැස්‌වීමට ජනතා විමුක්ති පෙරමුණට සිදුවනු ඇතැයි ද හෙතෙම කීවේය.
ජනාධිපතිවරණයක්‌ පැවැත්වීම සම්බන්ධයෙන් ජනතා විමුක්ති පෙරමුණේ කිසිදු විරෝධයක්‌ නැතැයි ද, එහෙත් නීති විරෝධී ජනාධිපතිවරණයක්‌ සඳහා තම පක්‍ෂය එකඟ නොවන බව ද කී ඉහත ප්‍රකාශකයා රටේ මූලික නීතියට පටහැනිව පවත්වන ජනාධිපතිවරණයකට තරග කිරීම ගැටලු සහගත තත්ත්වයක්‌ වනු ඇතැයි ද කීය.
ඉදිරි ජනාධිපතිවරණය සඳහා අපේක්‍ෂකයකු ලෙස මහින්ද රාජපක්‍ෂ මහතා නාමයෝජනා භාරදීමෙන් පසු මැතිවරණ කොමසාරිස්‌වරයා එම නාමයෝජනාව භාරගැනීමත් සමඟ එම ජනාධිපතිවරණය නීති විරෝධී එකක්‌ බවට පත්වන බව ද ඉහත ප්‍රකාශකයා කීවේය.
රටේ මූලික නීතිය උල්ලංඝනය කරමින් ජනාධිපති මහින්ද රාජපක්‍ෂ මහතා තුන්වැනි වරටත් ජනාධිපති ධුරය සඳහා තරග කිරීමට එරෙහිව ජනතා විමුක්ති පෙරමුණ විසින් රට පුරා ජනතාව දැනුවත් කිරීම සඳහා උද්ඝෝෂණ, සම්මන්ත්‍රණ සහ පෝස්‌ටර් ව්‍යාපාරයක්‌ අරඹන බව ද එම ප්‍රකාශකයා කීවේය.
ඒ අනුව "නීති විරෝධී ජනපතිවරණ එපා, මහින්දට තුන්වරක්‌ බෑ" යන තේමාව ඔස්‌සේ ප්‍රථම සම්මන්ත්‍රණය මෙම 15 වැනිදා මහනුවරදීත්, 17 වැනිදා කොළඹදීත් පැවැත්වීමට තීරණය කර ඇතැයි ද කී හෙතෙම ඉන්පසු රට පුරා දිස්‌ත්‍රික්‌ක මට්‌ටමින් මෙම සම්මන්ත්‍රණ මාලාව පවත්වන බව ද කීය.
ඒ මගින් නීති විරෝධී ජනාධිපතිවරණයට එරෙහිව ජනතාව පෙළගැස්‌වීමට ජනතා විමුක්ති පෙරමුණ නායකත්වය ලබාදෙන බව ද හෙතෙම වැඩිදුරටත් කීවේය.
(මුලාශය- දිවයින)
