අජිත් පී. පෙරේරා, ඉරාන් වික්‍රමරත්න,රුවන් විඡේවර්ධන, ආර්. යෝගරාජන්, නලින් බණ්‌ඩාර යන එජාප පාර්ලිමේන්තු මන්ත්‍රීවරු මෙම චාරිකාවට එක්‌වූහ.
මන්ත්‍රී පිරිස ප්‍රථමයෙන් මහර බන්ධනාගාරයට ගොස්‌ වැඩබලන බන්ධනාගාර කොමසාරිස්‌ උපුල්දෙනිය සහ බන්ධනාගාර නිලධාරීන් පිරිසක්‌ හමුවී අනතුරුව එහි තිබෙන අඩුපාඩු සම්බන්ධයෙන් සොයා බැලූහ.
මන්ත්‍රීවරුන්ගේ ආරක්‍ෂක නිලධාරීන්ට සහ මාධ්‍යවේදීන්ට ඔවුන් සමඟ බන්ධනාගාරයට ඇතුළුවීමට අවසර ලැබුණේ නැත.
මෙහිදී ප්‍රධාන වශයෙන්ම බන්ධනාගාරයේ භෞතික තත්ත්වය සොයා බැලූ බව එජාප පාර්ලිමේන්තු මන්ත්‍රී ඉරාන් වික්‍රමරත්න මහතා පැවැසීය.
මහර බන්ධනාගාරය තුළ සිරකරුවන්ගේ දැඩි තදබදයක්‌ තිබෙන බවත් "සිරකරුවෝද මනුෂ්‍යයෝ" යෑයි සඳහන් කළත් එය බෝඩ් ලෑල්ලකට පමණක්‌ සීමාවී ඇති බවත් හෙතෙම කීය.
සිරකරුවකු එක්‌ මැදිරියක රැඳවිය යුතු වූවත් පවතින තදබදය නිසා සිරකරුවන් හතර පස්‌දෙනා එකම සිරකූඩුවක රඳවා ඇතැයි පැවසූ මන්ත්‍රීවරයා ඔවුන් ඉතාම අඩුපහසුකම් යටතේ ඉතා අසීරුවෙන් ඒවා තුළ සිටින බවද කියා සිටියේය.
තමා ඇතුළු මන්ත්‍රී පිරිස එහි ගිය විට සිරකරුවන් ඉතා යහපත් ප්‍රතිචාර දැක්‌වූ බවත් බොහෝදෙනා පැමිණ මන්ත්‍රීවරුන් සමඟ සුහදව කතා කොට බන්ධනාගාරයේ අඩුපාඩුකම් විස්‌තර කළ බවත් මන්ත්‍රීවරයා සඳහන් කළේය.
මහර බන්ධනාගාරයේ පවතින අඩුපාඩු පිළිබඳව තමා ඇතුළු පිරිස කරුණු එක්‌රැස්‌ කර ගත් බවත් ඒ සම්බන්ධව ඉදිරියේදී වාර්තාවක්‌ සකසන බවත් ඉරාන් වික්‍රමරත්න මහතා පැවැසීය.
මහර බන්ධනාගාරයේ අඩුපාඩු සොයා බැලීමේ නිරීක්‍ෂණ චාරිකාවක ඊයේ (1දා) නිරත වූ අජිත් පී. පෙරේරා, ආර්. යෝගරාජන්, එරාන් වික්‍රමරත්න, නලින් බණ්‌ඩාර සහ රුවන් විඡේවර්ධන යන එජාප පාර්ලිමේන්තු මන්ත්‍රීවරුන් බන්ධනාගාරයෙන් පිටතට පැමිණි අයුරු ඡායාරූපයේ.
ඡායාරූප - නිමල් දයාරත්න
